ខុសពីការប៉ាន់ស្មានថាដែលផលិតករភាគច្រើនបំភ្លេចចោលអ្នកនាងកែវ កល្យាណ តារាជើងចាស់រូបនេះបានអះអាងថាការពិតអ្នកនាងមានគេទាក់ទងអោយថតភាពយន្តច្រើនណាស់ គឺមិនដូចអ្នកខ្លះដែលថាហេតុផលដែលអ្នកនាងមិនមានមុខក្នុងរឿង និងថាទទួលសម្ដែងនោះ គឺដោយសារតែគ្មានអ្នកហៅថត។ ក្នុងជំនួបដោយផ្ទាល់អ្នកនាងបានប្រាប់យ៉ាងច្បាស់ៗថា គ្រាន់តែឈានដល់ឆ្នាំ២០១៧ភ្លាមមានគេហៅអ្នកនាងថតដល់ទៅ៦រឿង ហើយសុទ្ធតែជារឿងល្អ ប៉ុន្តែអ្នកនាងច្រានចោល។

អ្នកនាងនិយាយថា អត់មានអ្នកណាមិនហៅអ្នកនាងថតដូចការលើកឡើងនោះទេ ពោលគឺមានតែតាមហៅដដែលហើយដដែលទៀតដោយមានទាំងការអង្វរករផង ដើម្បីអោយអ្នកនាងជួយសម្ដែងរឿងនេះមួយរឿង ឬរឿងនោះមួយរឿង។ អ្នកនាងនិយាយថាមកទល់នឹងខែមិថុនាឆ្នាំនេះ ផលិតករមកពីផលិតកម្មផ្សេងគ្នាដល់ទៅ៦រឿងបានទាក់ទងអ្នកនាងអោយចេញថត តែអ្នកនាងអត់ទទួល បើទោះជាមានលក្ខណ្ឌល្អបែបណា។ អ្នកនាងថាជ្រុលជាឈប់ពីការសម្ដែងទៅហើយ គឺអត់ទទួលវិញទេ ដោយអ្នកនាងមិនស្ដាយចំពោះរឿងទាំង៦ដែលគេហៅថតនោះផង ព្រមជាមួយនឹងការប្រកាសថាខ្លួនចាស់ទៅហើយតើនៅថតដល់ណាទៀត។ អ្នកនាងនិយាយថា«គេហៅថតច្រើនណាស់ មាន៦រឿងគ្រាន់តែចោល!»។ អ្នកនាងបានអះអាងថាហេតុផលដែលអ្នកនាងមិនទទួលថតកុន គឺមិនមែនបណ្ដាលមកពីអ្នកណាម្នាក់ដាក់បម្រាមហាមអ្នកនាង ឬមានសម្ពាធពីខាងគ្រួសារដែលមិនចង់អោយអ្នកនាងបន្តការសម្ដែងនោះទេ ប៉ុន្តែមកពីអ្នកនាងខ្លួនឯងមិនចង់ទទួលការសម្ដែងណាមួយតែម្ដង ទើបចង់ផលិតករណាមួយអោយតំណែងអ្នកនាងក្នុងរឿងបានល្អយ៉ាងណាក៏អ្នកនាងមិនធ្វើការពិចារណា។ អ្នកនាងប្រកាសថាខ្លួននៅតែបង្ហាញខ្លួនក្នុងកម្មវិធីជួបជុំអ្នកសិល្បៈ ដូចជាកម្មវិធីជប់លៀង និងកម្មវិធីរវល់របស់តារាសិល្បៈនានា ប៉ុន្តែសម្រាប់ការបង្ហាញខ្លួនជាថ្មីដើម្បីអោយគេឃើញគេហៅថតស្ពត ឬហៅថតរឿងគឺអត់ដាច់ខាត ដោយសារតែអ្នកនាងចង់ទុកពេលអោយទំនេរបានច្រើនដើម្បីមើលខុសត្រូវមុខជំនួញ។ យ៉ាងណាមិញ អ្នកនាងបដិសេធមិនបង្ហើបអោយដឹងថាអ្នកនាងមានមុខជំនួញអ្វីខ្លះក្នុងដៃនោះទេ ដោយអ្នកនាងបញ្ជាក់ថាគ្រាន់តែជាមុខរបររកស៊ី ដែលអ្នកនាងគិតថាមិនចាំបាច់បញ្ជាក់លម្អិត។ អ្នកនាងថាខ្លួនចាស់ហើយ គឺល្មមដល់ពេលត្រូវផ្ដល់ឱកាសអោយក្មេងជំនាន់ក្រោយហើយ ទើបអ្នកនាងប្រកាសច្រានចោលរឿងទាំង៦ ស្របគ្នាដែលអ្នកនាងក៏បានសរសើរថាក្មេងៗតារាសិល្បៈជំនាន់ក្រោយ គឺទាំងស្អាត និងមានសមត្ថភាពដែលមិនគួរនឹងជ្រើសយកអ្នកនាងដែលមានវ័យច្រើន អោយមកសម្ដែងទៀតទេ៕