(ភ្នំពេញ)៖ តារាចម្រៀងប្រុសល្បីឈ្មោះ មានសំនៀងទឹកដមពិរោះផ្អែម ប្រចាំផលិតកម្មរាម គឺលោក ដួង វីរៈសិទ្ធ នាពេលថ្មីៗនេះ បានធ្វើឲ្យមហាជន និងអ្នកគាំទ្រកោតសរសើរជាខ្លាំង តាមរយៈការសម្រេចបើកស្ទូឌីយូតន្ត្រីផ្ទាល់ខ្លាួន ដើម្បីជាការបំពេញបំណងអ្នកគាំទ្រ ដែលចង់ច្រៀងចម្រៀង Cover អាចធ្វើការអញ្ជើញមកស្ទូឌីយូរបស់លោកបាន។

តាមរយៈវីដេអូដែលបង្ហោះជាការជូនដំណឹងទៅកាន់មហាជន លោក ដួង វីរៈសិទ្ធ បានឲ្យដឹងថា ស្ទូឌីយូរបស់លោក គឺមានឈ្មោះថា «The Moon Studio» ហើយការបង្កើតស្ទូឌីយូនេះ គឺតបតាមការសំណូមពររបស់អ្នកគាំទ្រលោក ក្នុងការច្រៀង Cover បទរបស់លោក ក៏ប៉ុន្តែបទចម្រៀងរបស់លោក កឺមិនមានភ្លេងសុទ្ធដែលបង្ហោះក្នុងក្នុងយូធូបឡើយ។ លោកថា នេះជាមូលហេតុដែល លោកចង់ប្រាប់អ្នកគាំទ្រថា ចំពោះសាច់ភ្លេងដែលជាបទចម្រៀងរបស់លោក គឺទុកសម្រាប់បើកស្ទូឌីយូ ជូនបងប្អូនមកថតកម្សាន្ត។ រាល់ភ្លេងទាំងអស់ ជាភ្លេងដែលលោកបានផលិត និងសម្រួលតន្ត្រីផ្ទាល់។

លោក ឌួង វីរៈសិទ្ធ បានបន្តបញ្ជាក់ថា ចំពោះការថតសំឡេង និងបច្ចេកទេសសំឡេង គឺអ្នកគាំទ្រនឹងបានជួបជាមួយលោកផ្ទាល់តែម្តង។ លោកអាចនឹងប្រាប់បន្ថែមពីបច្ចេកទេសក្នុងការចម្រៀង ឬការប្រើសំឡេងមួយចំនួនបន្ថែមទៀត ដើម្បីឲ្យច្រៀងទៅកាន់តែពិរោះ។ លោកថា បន្ថែមពីនេះ ចំពោះអ្នកគាំទ្រដែលត្រូវការ ការពនិពន្ធបទភ្លេង ទំនុកច្រៀង និងសម្រួលតន្ត្រី តែមិនដឹងថាទៅរកនៅទីណានោះ គឺសូមអញ្ជើញមក «The Moon Studio»៕