(បរទេស)៖ Jane Marczewski ឬ Nightbirde ដែលជាអតីតបេក្ខនារីក្នុងកម្មវិធី America’s Got Talent បានទទួលមរណភាពហើយកាលពីថ្ងៃទី១៩ ខែកុម្ភ: ឆ្នាំ២០២២ នេះបើតាមការឱ្យដឹងពីគ្រួសាររបស់នាង។
Nightbirde ធ្លាប់បានធ្វើឱ្យគណកម្មការ និងទស្សនិកជនរំជួលអារម្មណ៍ជាមួយនឹងអត្ថន័យបទចម្រៀង “It’s Ok” ដែលនាងបានច្រៀងពេលប្រកួត ដោយនាងបានឱ្យដឹងថានាងមានជំងឺមហារីករយ:ពេល៤ឆ្នាំហើយ ប៉ុន្តែទោះជាយ៉ាងណានាងមិនអស់សង្ឃឹមឡើយ នាងនឹងតស៊ូឱ្យដល់ទីបំផុតមិនព្រមចុះចាញ់ឡើយ។
រហូតមកដល់ពេលនេះ Nightbirde តស៊ូលែងទៅមុខទៀតក្រោយជំងឺមហារីកបានរាលដាលដល់សួត ឆ្អឹងខ្នង និងថ្លើមរហូតនាងទ្រាំទ្រលែងបានទៀត និងបានទទួលមរណភាពក្នុងវ័យ៣១ឆ្នាំ។ គួររំឭកដែរថា ក្រោយចូលរួមប្រកួតក្នុងកម្មវិធី America’s Got Talent រួចមក Nightbirde ទទួលបានអ្នកគាំទ្រយ៉ាងច្រើនត្រឹមមួយប៉ប្រិចភ្នែក ដែលនាងបានក្លាយជាអ្នកលើកទឹកចិត្តដល់មហាជនដែលមានអារម្មណ៍បាក់ទឹកចិត្តផងដែរ។
ការលាទៅលែងត្រលប់របស់ Nightbirde បានធ្វើឱ្យអ្នកគាំទ្រជាច្រើនស្លុតចិត្ត ប៉ុន្តែទោះជាយ៉ាងណា នាងក៏នៅតែស្ថិតក្នុងបេះដូងគ្រប់គ្នាជានិច្ច៕
មតិយោបល់