ភ្នំពេញ: បើទោះជាការប្រគំតន្ត្រី និងដើរលើកម្រាលព្រំរបស់និស្សិតពេទ្យន័រតុនកាលពីថ្ងៃទី១៧ កញ្ញា ត្រូវរំខានដោយភ្លៀង ក៏តារាកុះករដែលបានប្រកាសឡើង នៅតែបានបង្ហាញខ្លួន។ ទាំងតារាចម្រៀង ទាំងសម្ដែង និងតារាកំប្លែង សុទ្ធតែមកបង្អួតសម្រស់ជាមួយនឹងម៉ូដសម្លៀកបំពាក់ប្លែកៗ និងស្រស់ស្អាត នៅក្នុងព្រឹត្តការណ៍នេះ។

ជាមួយនឹងលះបង់របស់តារាល្បីៗដែលសុខចិត្តច្រៀង រាំ និងដើររ៉ៃអង្គាសថវិកាទាំងដំណក់ទឹកភ្លៀងនេះហើយ គេកត់សម្គាល់ថា នេះព្រឹត្តការណ៍ជោគជ័យ ដោយក្នុងនោះតារាល្បីៗ ក៏ធ្វើសកម្មភាពកាន់ហិបដើររ៉ៃអង្គាសថវិកានៅក្នុងពិធីរហូតចប់ចុងចប់ដើម។

យ៉ាងណាមិញ ចំពោះថវិកានៅមិនទាន់បានបូកសរុបនៅឡើយទេ ដោយសារតែព្រឹត្តិការណ៍ទាំងមូល ត្រូវរង់ចាំព្រឹត្តិការណ៍តាំងពិព័រណ៌ពេញមួយថ្ងៃទី១៨ កញ្ញានេះទៀត។ ខាងក្រោមនេះទិដ្ឋភាពតារាល្បីៗ ដែលបានបង្ហាញខ្លួននៅក្នុងព្រឹត្តិការណ៍ទាំងមូល៕