ពេជ្រ សោភា កាន់តែកំសត់ ក្រោយបាត់បង់បុរសអាមេរិក

មានការចាប់អារម្មណ៍គួរសមថាតារាចម្រៀងពេជ្រ សោភា កាន់តែកំសត់ជាងមុន បន្ទាប់ពីនាងសម្រេចចិត្តទម្លាយរឿងរ៉ាវលះលែងជាមួយបុរសអណិកជនជាសាធារណៈ។ លើឆាកតន្ត្រីបើទោះជានាងនៅតែច្រៀងបទញាក់កន្ត្រាក់អារម្មណ៍អមដោយក្បាច់រាំ ក៏ទឹកមុខរបស់នាងនៅតែបង្កប់ ភាពស្រងូតស្រងាត់។

ប៉ុន្តែស្ថានភាព និងទឹកមុខស្រពាប់ស្រពោនដែលបានបង្ហាញឡើង ក៏ជួយអោយបទ«អូនទៅហើយ»ដែលជាបទឆ្លុះបញ្ចាំងពីជីវិតឯកជនរបស់នាង ត្រូវបានមហាជនចាប់អារម្មណ៍រហូតក្លាយជាបទផ្ទុះនាពេលនេះផងដែរ។

ពេជ្រ សោភា បានចាត់ទុកថាបទ«អូនទៅហើយ»ដែលជាបទនិពន្ធថ្មីរបស់ខ្លួន លេចឡើងស្របនឹងបរិបទមហាជនភាគច្រើនបានដឹងថានាង និងស្វាមីដែលជាអណិកជនអាមេរិកបានដាច់ស្រេចគ្នា។ នាងសារភាពថាលោកឡៅ ឆយី ជាអតីតស្វាមីមាននារីកំណាន់ចិត្តថ្មី ដោយនារីម្នាក់នោះ នាងក៏ស្គាល់ច្បាស់ដូចថ្ងៃផងដែរ ទើបអ្នកណាៗក៏គិតមិនខុសគ្នាថាជារឿងឈឺចាប់បំផុតមិនខុសពីបទ«អូនទៅហើយ»ដែលនាងបកស្រាយ ដោយសារតែមនុស្សដែលឱបជាប់ទ្រូង ត្រូវបាននារីម្នាក់ផ្សេង ដែលនាងស្គាល់ច្បាស់យកបាន។

នាងធ្លាប់ទទួលស្គាល់ថាអត្ថន័យនៅក្នុងបទចម្រៀងនេះ ផុសចេញពីរឿងពិតនៃស្នេហារបស់នាង។ ប៉ុន្តែមិនមានន័យថាអត្ថបទនេះឆ្លុះបញ្ចាំងពីជីវិតអស់សង្ឃឹមរបស់នាងក្រោយបែកបាក់ស្នេហ៍នោះទេ ដោយសារតែនាងគឺជានារីរឹងមាំ មិនដូចគ្នានឹងតួអង្គក្នុងបទចម្រៀង។ នាងថាបទនេះបានទទួលការគាំទ្រក្រោយពេលចេញផ្សាយ ដែលសន្ទុះនៃការគាំទ្រ ត្រូវគេឃើញគ្រប់គ្នាថាជាចំហាយក្រោយពេលមហាជនងាកមកចាប់អារម្មណ៍ពីស្នេហាបែកបាក់របស់នាង។

ធៀបនឹងរយៈពេលមុនសារភាពថាបានលែងប្ដី គេឃើញបទមនោសញ្ចេតនានិពន្ធថ្មីជាច្រើនរបស់នាងដែលបាននិពន្ធឡើងហាក់មិនសូវមានសន្ទុះគាំទ្រនោះទេ បើទោះជាបទទាំងនោះមានអត្ថន័យ និងបទភ្លេងល្អ។ ប៉ុន្តែបើក្រឡេកមើលបទ«អូនទៅហើយ»គឺសន្ទុះគាំទ្រមានកម្រិតខុសប្លែក។

បទនេះត្រូវគេទទួលស្គាល់ថាចាក់ត្រូវអារម្មណ៍មហាជន ចំពេលរឿងរ៉ាវរវាងនាង និងលោក ឡៅ ឆយី ជាអតីតស្វាមីត្រូវបានទម្លាយ។ នៅលើបណ្ដាញហ្វេសប៊ុកមានការចែកចាយMV បទ«អូនទៅហើយ»របស់នាងច្រើន អមដោយសំណេរយ៉ាងខ្លីថា«អាណិតបងភាណាស់!»។ អ៊ីចឹងហើយ ទើបទឹកមុខស្រពាប់ស្រពោនរបស់នាង កាន់តែរុញឲ្យតារារូបនេះទទួលបានការអាណិត ហើយជះឥទ្ធិពលឲ្យបទ«អូនទៅហើយ»របស់នាងផ្ទុះខ្លាំង៕
pich-sophea-1