កាលពីថ្ងៃទី៥ វិច្ឆិកា អតីតតារាចម្រៀងរ៉ុក លោកញឹម ចម្រើន បានចូលរោងការហើយ ដោយមង្គលការរបស់លោក ត្រូវគេឃើញមានការចូលរួមពីវត្តមាន តារាល្បីៗចាស់ក្មេងច្រើនគួរសម។ អ្វីដែលគេចាប់អារម្មណ៍នោះ គឺភរិយារបស់លោកជាអតីតស្រីស្អាត របស់ក្រុមហ៊ុនKTH និងជាក្មួយបង្កើតរបស់អ្នកនាងស៊ុន ណារីម៉ូនីកា។
អ្នកនាង ស៊ុន ណារីម៉ូនីកា ជាម្ដាយមីងកូនក្រមុំបានអះអាងថា ទំនាក់ទំនងស្នេហ៍រវាងក្មួយស្រី របស់អ្នកនាង និងលោកញឹម ចម្រើន ម្ចាស់បទ«មិនធ្វើសង្គ្រាមទេអូន» មានរយ:ប្រមាណជា៣ឆ្នាំមកហើយ មុនពេលអ្នកទាំងពីរចូលរោងជាផ្លូវការជាមួយគ្នា។ អ្នកនាងថាលោកញឹម ចម្រើន នៅតែច្រៀងដូចដើមដដែល បើទោះជាផលិតកម្មរ៉ុកបិទទ្វារឈប់ដំណើរការផលិតចម្រៀង។ អ្នកនាងថាលោកចម្រើនច្រៀង ក្នុងក្លិបកម្សាន្តមួយ ដោយក្មួយស្រីរបស់លោកក៏ជាម្ចាស់ មុខជំនួញមួយជារបស់ខ្លួន។ អ្នកនាងថាលោក ញឹម ចម្រើន និងក្មួយស្រីភ្ជាប់ពាក្យគ្នាមួយឆ្នាំមកហើយ ដោយអ្នកទាំងពីរក៏បានបើកហាងផឹកស៊ីមួយចូលគ្នាមុនពេលរៀបការ។ អ្នកនាងថាកូនក្រមុំឈ្មោះ អ៊ុន វណ្ណកណិកា ហើយបើនិយាយពីទំនាក់ទំនងគឺមិនខុសពីកូន និងម្ដាយនោះទេ ដោយកូនក្រមុំហៅអ្នកនាងថាម្ដាយៗតាំងពីតូច។ ដោយឡែក លោកញឹម ចម្រើន ក៏ប្រកាសជំហរបន្តអាជីពចម្រៀង នៅក្នុងផលិតកម្មផងដែរ បើមានការទាក់ទងឲ្យ លោកចូលច្រៀងក្នុងផលិតកម្មជាថ្មី។
ក្នុងពិធីមង្គលការរបស់លោកមានវត្តមានតារាល្បីៗ មួយចំនួនដូចជាអ្នកនាង ស៊ុន ណារីម៉ូនីកា, លោកពូឃ្លោក, នាយត្រដក់, លោកហ្វៃ សំអាង, អ្នកនាងប្រាសាទ ដាវីន, លោកខាន់ជេមស៍, លោកទិត្យ វិច្ឆិកា, លោកដូដូ, លោកវង្ស តារារតនា, និងតារាល្បីៗមួយចំនួនទៀត ។
មតិយោបល់