ភ្នំពេញ: ក្រុមចោរប្លន់រថយន្ត២នាក់បងប្អូន ដោយមានម្នាក់ជា មន្ត្រីយោធាផងនោះ ត្រូវបានលោក ឡុង កេសភារម្យ ប្រធានក្រុមប្រឹក្សាចៅក្រមជំនុំជម្រះសាលាដំបូងរាជធានីភ្នំពេញ បើកសវនាការកាត់ទោស នៅព្រឹកថ្ងៃទី២៣ ខែវិច្ឆិកា ឆ្នាំ២០១៦នេះ ពាក់ព័ន្ធករណីប្លន់រថយន្តឡិចស៊ីស 470 នៅខណ្ឌពោធិ៍សែនជ័យ កាលពីអំឡុង ខែឧសភា កន្លងទៅ។

ជនជាប់ចោទទី១ឈ្មោះ ហ៊ន សំណាង ភេទប្រុស អាយុ ៣១ឆ្នាំ មុខរបរ មន្ត្រីយោធា នៅកងកាំភ្លើងធំ ជាអ្នកធ្វើសកម្មភាព ជាប្អូន និងទី២ឈ្មោះ ហ៊ន វណ្ណ: ហៅតឿ ភេទប្រុស អាយុ៣៥ឆ្នាំ មុខរបរសន្តិសុខយាមឃ្លាំងក្រុមហ៊ុនកូរ៉េ GGK ជាបង ត្រូវបានលោកស្រី ស៊ឺ វណ្ណនី តំណាងអយ្យការ បានចោទប្រកាន់ពីបទ លួចមានស្ថានទម្ងន់ទោសដោយសារការប្រើអំពើហិង្សា បទកាន់កាប់អាវុធដោយគ្មានការអនុញ្ញាត និងបទ ទទួលផលចោរកម្ម ប្រព្រឹត្តកាលពីថ្ងៃទី១៦ ខែឧសភា ឆ្នាំ២០១៦ នៅចំណុចដីវាល ភូមិពង្រ សង្កាត់ស្នោរ ខណ្ឌពោធិ៍សែនជ័យ យោងតាមមាត្រា ៣៥៣ មាត្រា ៣៥៧ មាត្រា ៣៩៩ មាត្រា ៤០០ និងមាត្រា ៤៩០ នៃក្រមព្រហ្មទណ្ឌ។

នៅក្នុងសវនាការនាព្រឹកថ្ងៃទី២៣ ខែវិច្ឆិកា ឆ្នាំ២០១៦ ជនជាប់ចោទបានថ្លែងទទួលស្គាល់ការចោទប្រកាន់របស់តំណាងអយ្យការ និងជនជាប់ចោទឈ្មោះ ហ៊ន សំណាង បានសារភាពថា នៅថ្ងៃកើតហេតុខ្លួនបាន ណាត់ជនរងគ្រោះឈ្មោះ ឡាក់ សម្បត្តិ ឱ្យយករថយន្តម៉ាក ឡិចស៊ីស 470 ពណ៌ខ្មៅ ពាក់ស្លាកលេខ 2S-9927 មកឱ្យខ្លួនមើល ដើម្បីសាក និងតថ្លៃទិញក្នុងតម្លៃ៣៦,០០០ដុល្លារ។ នៅពេលជួបគ្នា រូបគេបានសុំជនរងគ្រោះឈ្មោះ ឡាក់ សម្បត្តិ កាន់ដៃចង្កូត និងបើកសាក រថយន្ត ពេលនោះរូបគេបានដកអាវុធខ្លីម៉ាក K59 ភ្ជង់គំរាម ឱ្យជនរងគ្រោះចុះពីលើរថយន្ត រួចក៏បើករថយន្តទៅលាក់ទុកនៅក្នុងឃ្លាំងក្រុមហ៊ុនកូរ៉េ GGK ដែលបងប្រុសធ្វើការជាសន្តិសុខនៅទីនោះ។

សំណុំរឿងនេះតុលាការនឹងប្រកាសសាលក្រមនៅព្រឹកថ្ងៃទី១៩ ខែធ្នូ ឆ្នាំ២០១៦ខាងមុខ៕