ភ្នំពេញៈ យុទ្ធនាការ១៦ថ្ងៃបំពាក់បូពណ៌ស គឺជាយុទ្ធនាការអន្តរជាតិមួយ ដែលបានរៀបចំធ្វើជារៀងរាល់ឆ្នាំ តាំងពីឆ្នាំ១៩៩១ គឺចាប់ពីថ្ងៃទី២៥ ខែវិច្ឆិកា ដល់ថ្ងៃទី១០ ខែធ្នូ ដើម្បីលើកកម្ពស់ការយល់ដឹងអំពីសិទ្ធិ និងបញ្ឈប់រាល់ទម្រង់នៃអំពើហិង្សាលើស្រ្តី។

យោងតាមសេចក្តីប្រកាសព័ត៌មានរបស់បណ្តាញយុវជនកម្ពុជា(CMN) អង្គការយេនឌ័រ និងអភិវឌ្ឍន៍ដើម្បីកម្ពុជា(GADC) ដោយមានការគាំទ្រផ្នែកហិរញ្ញវត្ថុពីអង្គការ អុកហ្វាម អង្គការឌៀកូនៀ ព្រមទាំងបុត្រសម្ព័ន្ធរបស់ខ្លួនមួយចំនួនទៀតបានឲ្យដឹងថា នៅកម្ពុជា ឆ្នាំ២០១៦នេះ យុទ្ធនាការ១៦ថ្ងៃបំពាក់បូពណ៌សធ្វើឡើងក្រោមប្រធានបទ “បញ្ឈប់អំពើហិង្សាលើស្រ្តី និងកុមារចាប់ផ្តើមពីយើង” ដែលនឹងធ្វើនៅក្នុងរាជធានីភ្នំពេញ និងខេត្តគោលដៅចំនួន១០ផ្សេងទៀត រួមមានៈ សៀមរាប បាត់ដំបង ពោធិ៍សាត់ កំពង់ឆ្នាំង កំពង់ស្ពឺ កំពង់ចាម ក្រចេះ ព្រៃវែង និងស្វាយរៀង។

ក្រុមអង្គការទាំងនោះបានបង្ហាញថា សព្វថ្ងៃអំពើហិង្សាក្នុងគ្រួសារ និងអំពើហិង្សាលើស្រ្តីនិងកុមារ នៅតែបន្តកើតមាននៅក្នុងប្រទេសកម្ពុជា ហើយមានរូបភាពកាន់តែសាហាវឡើង ជាបន្តបន្ទាប់ឥតឈប់ឈរ។ ផ្អែកតាម ការស្ទង់មតិស្រ្តីចំនួន ៣ ៥៧៤នាក់ នៅទូទាំងប្រទេសកម្ពុជា ដែលធ្វើឡើងដោយក្រសួងកិច្ចការនារីរកឃើញថា “យ៉ាងហោចស្រ្តីម្នាក់ នៅក្នុងចំណោម៥នាក់ នៅកម្ពុជានិយាយថា ពួកគេបានទទួលរងអំពើហិង្សាផ្លូវកាយ និងផ្លូវភេទ”។

នៅក្នុងខែវិច្ឆិកានេះ មានអំពើហិង្សាធ្ងន់ធ្ងរ និងឃោឃៅ ដូចជា ករណីប្តីសម្លាប់ប្រពន្ធ ហើយយកសពទៅលាក់ទុកក្រោមគ្រែក្នុងបន្ទប់ជួល នៅសង្កាត់ស្ទឹងមានជ័យ។ ករណីរឹតកសម្លាប់ស្រ្តីជាសង្សារ យកទៅប្លុងចោលនៅគំនរសំរាម ករណីដុតសម្លាប់ចៅស្រី ករណីអំពើហិង្សាធ្ងន់ធ្ងរលើតារាសម្តែង កញ្ញា ពេជ្រ អារីហ្សា ជាដើម។

តាមរយៈយុទ្ធការនេះ លោកស្រី រស់ សុភាព នាយិការប្រតិបត្តិអង្គការយេនឌ័រ និងអភិវឌ្ឍន៍ដើម្បីកម្ពុជា បានលើកឡើងថា “សូមជំរុញឲ្យមានការអនុវត្តច្បាប់បានប្រសើរជាងនេះ ដោយគ្មានការលើកលែងទោសចំពោះជនដែលប្រព្រឹត្ត ហើយកុំចាត់ទុកទង្វើរបស់ជនរងគ្រោះជាប្រភពនៃការប្រើប្រាស់ហិង្សា។ ដើម្បីអាចបញ្ឈប់ ក៏ដូចជាបញ្ចប់អំពើហិង្សាបាន គឺត្រូវចាប់ផ្តើមពីយើងម្នាក់ៗ ដោយធ្វើការប្តេជ្ញាចិត្តបញ្ឈប់ និងឈប់ចាត់ទុកអំពើហិង្សាលើស្រ្តីនិងកុមារ ជាករណីធម្មតាតទៅទៀត”៕