ភ្នំពេញ: ទីតាំងហ្គេមបាញ់ត្រី១កន្លែង ត្រូវកម្លាំងនគរបាលខណ្ឌទួលគោកសហការជាមួយកម្លាំងគណ:បញ្ជាការឯកភាពខណ្ឌទួលគោក ដែលមានមានការដឹកនាំផ្ទាល់ដោយលោក កែវ សុជាតិ ព្រះរាជអាជ្ញារង អមសាលាដំបូងរាជធានីភ្នំពេញ លោក ប៉ាង លីដា អភិបាលរងខណ្ឌទួលគោក លោក ស៊ឹម ពិសិដ្ឋ អធិការរងទទួលផ្នែកយុត្តិធម៌ បានធ្វើការចុះប្រតិបត្តិការ និងបង្ក្រាប ហើយបានឃាត់ខ្លួនមនុស្ស៧នាក់ ទូហ្គេមត្រី១គ្រឿង និងម៉ូតូ៤គ្រឿង។

ហេតុការណ៍ចុះបង្ក្រាបនេះ បានធ្វើឡើងកាលពីវេលាម៉ោង៨និង២០នាទីព្រឹកថ្ងៃទី ២៦ ខែវិច្ឆិកា ឆ្នាំ២០១៦ នៅចំណុចផ្ទះលេខ៦៥ ផ្លូវរថភ្លើង ភូមិ១៤ ក្រុម៥៤ សង្កាត់បឹងកក់ទី១ ខណ្ឌទួលគោក រាជធានីភ្នំពេញ។

បច្ចុប្បន្នមនុស្សទាំង៧នាក់ខាងលើ ត្រូវមត្ថកិច្ចឃាត់ខ្លួនយកមកសាកសួរនៅអធិការដ្ឋាននគរបាលខណ្ឌទួលគោក ដើម្បីធ្វើការអប់រំ៕