ត្បូងឃ្មុំ: រថយន្តធុនធ្ងន់កែច្នៃខុសលក្ខណ:បច្ចេកទេសចំនួន៥គ្រឿង ត្រូវបានសមត្ថកិច្ចជំនាញចាប់កាត់ទ្រុង និងរថយន្តដឹកលើសទម្ងន់ចំនួន៧គ្រឿងត្រូវបានធ្វើការផាកពិន័យ។
ប្រតិបត្តិការនេះ ត្រួតកម្លាំងសមត្ថកិច្ចពិនិត្យលក្ខណ:បច្ចេកទេសយានយន្ត បានធ្វើឡើងកាលពីថ្ងៃទី២៥ ខែវិច្ឆិកា ឆ្នាំ២០១៦ ម្សិលមិញនេះ ដោយមន្ត្រីក្រសួងសាធារណការសហការជាមួយកម្លាំងនគរបាល និងកងរាជអាវុធហត្ថខេត្តត្បូងឃ្មុំលើដងផ្លូវជាតិលេខ៧ ផ្លូវជាតិលេខ៧២ និងផ្លូវជាតិលេខ៨ ក្នុងខេត្តត្បូងឃ្មុំដែលកំពុងរងការខូចខាត។
លោក សេង ឈួន រដ្ឋលេខាធិការក្រសួងសាធារណការ និងដឹកជញ្ជូន ជាប្រធានគណ:កម្មាធិការត្រួតពិនិត្យរថយន្តដឹកជញ្ជូនលើសកម្រិតកំណត់ និងខុសបច្ចេកទេសបានឲ្យដឹងថា យុទ្ធនាការបង្ក្រាបរថយន្តធុនធំ ជាបទបញ្ជារបស់ប្រមុខថ្នាក់ដឹកនាំ ហេតុដូចនេះ គឺត្រូវតែធ្វើការបង្ក្រាបជាដាច់ខាត មិនយោគយល់ដល់ក្រុមហ៊ុន ឬមន្ត្រីណាឡើយឲ្យតែរថយន្តនោះវែងហួសលក្ខណ:បច្ចេកទេស ត្រូវកាត់ចោលនៅនឹងកន្លែង ហើយប្រសិនបើខុសលើសទម្ងន់ ត្រូវទម្លាក់ទម្ងន់ចុះផាកពិន័យទៅតាមទម្ងន់ដែលលើស បើមិនដូច្នេះទេ គឺមិនឲ្យធ្វើចរាចរណ៍លើផ្លូវបានឡើយ ។
លោកបានបញ្ជាក់ថា ការងារនេះនឹងត្រូវអនុវត្តន៍ រហូតដល់អស់រថយន្តដែលល្មើសច្បាប់ ហើយនឹងត្រូវប្រគល់ភារកិច្ចជូនទៅអភិបាលរងខេត្តទូទាំងប្រទេស ជាប្រធាន និងមន្ទីរសាធារណការ និងដឹកជញ្ជូនខេត្ត ជាអនុប្រធាន ដោយមានការចូលរួមពីកម្លាំង មានសមត្ថកិច្ច ដូចជា មន្ត្រីនគរបាល និងកងរាជអាវុធហត្ថ៕
មតិយោបល់