ស្វាយរៀងៈ ជនសង្ស័យ២នាក់ ត្រូវបានកម្លាំងកងរាជអាវុធហត្ថខេត្តសហការជាមួយអាវុធហត្ថក្រុងបាវិតឃាត់ខ្លួនដោយចោទប្រកាន់ពីបទលួចម៉ូតូ នៅភូមិបាវិតកណ្តាល សង្កាត់បាវិត ក្រុងបាវិត កាលពីវេលាម៉ោង៧និង១៣នាទីយប់ ថ្ងៃទី២៩ ខែវិច្ឆិកា ឆ្នាំ២០១៦។

លោកវរះសេនីយ៍ត្រី គង់ កាន នាយការិល័យបទល្មើសព្រហ្មទណ្ឌនៃទីបញ្ជាការដ្ឋានកងរាជអាវុធហត្ថខេត្តស្វាយរៀងបានឲ្យដឹងថា ជនសង្ស័យដែលសកម្មភាពលួចម៉ូតូនេះ ទី១មានឈ្មោះ កាវ​ហ្វឹកថាន់ ភេទប្រុស អាយុ១៦ឆ្នាំ មានទីលំនៅភូមិភឿកលូ ស្រុកតាងបាង ខេត្តតៃនិញ ប្រទេសវៀតណាម និងទី២ឈ្មោះ ងួន សាលី ហៅចិន ភេទប្រុស អាយុ២៣ឆ្នាំ មានទីលំនៅភូមិបាវិតកណ្តាល សង្កាត់បាវិត ក្រុងបាវិត។

លោកបានបន្តថា កាលពីថ្ងៃទី២៩ ខែវិច្ឆិកា ឆ្នាំ២០១៦ វេលាម៉ោង៧និង១៣នាទីយប់ ជនរងគ្រោះឈ្មោះ សុខ ថាត ភេទប្រុស អាយុ២៦ឆ្នាំ រស់នៅភូមិសង្កាត់ខាងលើ បានជិះម៉ូតូទៅលេងផ្ទះមិត្តភក្តិ នៅភូមិបាវិតកណ្តាល សង្កាត់បាវិត ខណៈដែលទៅដល់បានចតម៉ូតូទុកនៅខាងមុខផ្លូវចូលផ្ទះមិត្តភក្តិ ហើយបានចូលទៅជជែកគ្នាលេងនៅក្នុងផ្ទះអស់រយៈពេលជិតមួយម៉ោង ទើបចេញមកក្រៅវិញ ដោយរកម៉ូតូមិនឃើញក៏បានសង្ស័យថាមានចោរលួចបាត់។
លោកបានបន្តទៀតថា ជនរងគ្រោះក៏បានសង្ស័យទៅលើឈ្មោះងួន សាលី ហៅចិន ជាអ្នកយកម៉ូតូ ព្រោះបានឃើញជនសង្ស័យរូបនេះដើរចេញពីផ្ទះមិត្តភក្តិនេះដែរ ហើយស្រាប់តែបាត់ម៉ូតូតែម្តង។ ហើយបានតាមរកភ្លាមៗដល់មុខកាស៊ីណូពិភពថ្មី ក៏បានជួបហើយសួររកម៉ូតូរបស់ខ្លួនវិញ ខណះនោះជនសង្ស័យប្រាប់ថា មានម្នាក់ទៀតជាអ្នកយក ពេលនោះជនរងគ្រោះក៏ឃើញម្នាក់ទៀតដែលជនសង្ស័យបានបង្ហាញប្រាប់ថាជាអ្នកលួចនោះ ជនរងគ្រោះក៏បានស្រែកឡើងថាចោរៗ ពេលនោះប្រជាពលរដ្ឋនាំគ្នាដេញចាប់ គាប់ជូនមានសមត្ថកិច្ចចុះត្បាតក៏តាមចាប់បានជនសង្ស័យទាំងពីរនាក់នាំខ្លួនមកធ្វើការសួរនៅមូលដ្ឋានកងរាជអាវុធហត្ថក្រុងបាវិត។

បច្ចុប្បន្ន ជនសង្ស័យទាំង២នាក់ត្រូវបានបញ្ជូនទៅកាន់សាលាដំបូងខេត្តដើម្បីចាត់ការទៅតាមនីតិវិធីច្បាប់៕