ភ្នំពេញ ៖ ហេតុការណ៍ដ៏ភ្ញាក់ផ្អើលមួយបានកើតឡើង ខណៈសិស្សសាលារៀនសុវណ្ណភូមិ២ក្រុមដេញប្រយុទ្ធគ្នាប្រសេចប្រសាចតាមដងផ្លូវដូចក្នុងក្រុមបងធំនៅក្នុងរឿងភាគចិនហុងកុងកាលពីវេលាម៉ោង១១ព្រឹក ថ្ងៃទី១៤ ខែធ្នូ ឆ្នាំ២០១៦ នៅតាមបណ្ដោយផ្លូវជាតិលេខ៤ ត្រង់ចំណុចជិតសាលារៀនខាងលើដែលមានទីតាំងក្នុងភូមិថ្នល់បំបែក សង្កាត់ចោមចៅ ខណ្ឌពោធិ៍សែនជ័យ។
ក្រុមសិស្សដែលវាយប្រយុទ្ធគ្នាទាំងពីរភាគីនោះមិនត្រូវបានគេប្រាប់ឲ្យដឹងពីអត្តសញ្ញាណនោះទេគ្រាន់តែដឹងថាពួកគេគឺជាសិស្សដែលរៀននៅសាលារៀនសុវណ្ណភូមិ ដែលម្ខាងៗមានគ្នាពី៣ទៅ៤នាក់ ប្រើប្រាស់ខ្សែក្រវាត់ និងដុំថ្មជិះម៉ូតូដេញវាយគ្នាទៅវិញទៅមក ប៉ុន្តែសំណាងល្អមិនមានភាគីណាមួយរងរបួសធ្ងន់ធ្ងរឡើយ ហើយពួកគេបានដេញវាយគ្នាទាំងឯកសណ្ឋានជាសិស្សសាលាតែម្ដង ។
តាមប្រភពព័ត៌មានបានឲ្យដឹងថា កាលពីប៉ុន្មានខែមុនពេលកើតហេតុនេះសិស្សទាំងពីរក្រុមខាងលើបានមានទំនាស់គ្នាជាបន្តបន្ទាប់រហូតមានគំនុំគុំគួនគ្នាថែមទៀតផង លុះដល់ពេលកើតហេតុ ខណៈពេលចេញពីរៀនភាគីម្ខាងបានដកខ្សែក្រវាត់វាយភាគីម្ខាងទៀត ទើបធ្វើឲ្យភាគីម្ខាងទៀតមានកំហឹង ហើយហូតខ្សែក្រវាត់ និងកាន់ដុំថ្ម ដេញវាយតបតវិញយ៉ាងប្រសេចប្រសាច គ្មានវិន័យជាសិស្សបន្តិចណាឡើយ បង្កឲ្យមានការភ្ញាក់ផ្អើលយ៉ាងខ្លាំងតាមដងផ្លូវ ហើយខណៈនោះភាគីដែលវាយគេមុនបានជិះម៉ូតរត់ចេញពីគូសត្រូវយ៉ាងស្លន់ស្លោរបំផុតចេញពីសាលាបណ្ដាលឲ្យដួលចូលក្នុងភក់ ហើយត្រូវគូទំនាស់តាមទាន់ដេញវាយសងសឹករហូតមានការអន្តរាគមន៍ពីកម្លាំងនគរបាលប៉ុស្ដិ៍ចោមចៅ ទើបក្រុមអ្នកដេញបានជិះម៉ូតូគេចខ្លួនបាត់ ។
ប្រភពបានបន្តថា ក្រោយពេលកើតហេតុ ភាគីខាងគូទំនាស់ដេញវាយបានទៅកាន់ប៉ុស្ដិ៍នគរបាលចោមចៅដាក់ពាក្យបណ្ដឹង ចំណែកភាគីអ្នកដេញវាយគេក៏ត្រូវបាននគរបាលហៅឲ្យចូលខ្លួនទៅប៉ុស្ដិ៍ដែរ បន្ទាប់មកនគរបាល មិនបានឃាត់ភាគីណាមួយនោះទេ គឺបានធ្វើការអប់រំពួកគេទាំងសង្ខាង និងធ្វើកិច្ចសន្យាបញ្ចប់ជម្លោះ និងការគុំគួនគ្នាទៅវិញទៅមក ដោយមានអាណាព្យាបាលទៅជួបជជែកគ្នាទាំងសាងខាងចូលរួមសម្របសម្រួលបញ្ចប់រឿងផងដែរ៕
មតិយោបល់