ភ្នំពេញៈ សមត្ថកិច្ចខណ្ឌឫស្សីកែវ សហការជាមួយសមត្ថកិច្ចប៉ុស្តិ៍ស្វាយប៉ាក បានឆ្មក់ចូលបង្ក្រាបទីតាំងជួញដូរ និងចែកចាយគ្រឿងញៀនមួយកន្លែង កាលពីវេលាម៉ោង៥និង១០នាទីល្ងាច ថ្ងៃទី២១ ខែធ្នូ ឆ្នាំ២០១៦ ស្ថិតនៅចំណុចក្រុម៧ ភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ។

សមត្ថកិច្ចបានឲ្យដឹងថា ជនសង្ស័យមានឈ្មោះ ចាន់ ហាវ ភេទប្រុស អាយុ២៨ឆ្នាំ មុខរបរមិនពិតប្រាកដ មានទីលំនៅកន្លែងកើតហេតុខាងលើ និងបានដកហូតសម្ភារៈមួយចំនួនមាន កាំភ្លើងខ្លីកែច្នៃ១ដើម ដាវ១ដើម ម្សៅក្រាមពណ៌សថ្លាចំនួន២១កញ្ចប់ និងថ្លង់ប្លាស្ទិចសម្រាប់ច្រកមួយចំនួនទៀត។

សមត្ថកិច្ចបន្តថា មុខសញ្ញាជួញដូរ និងចែកចាយគ្រឿងញៀននេះ គឺសមត្ថកិច្ចបានធ្វើការស្រាវជ្រាវរយៈពេល ២ទៅ៣អាទិត្យមកហើយ ដោយនៅថ្ងៃនេះ សមត្ថកិច្ចឆ្មក់ចូលបង្ក្រាប ឃាត់ខ្លួនបានជនសង្ស័យម្នាក់ និងដកហូតថ្នាំញៀនចំនួន២១កញ្ចប់ ដោយជនសង្ស័យលាក់ទុកនៅក្នុងកញ្ចប់បារី។

ក្រោយពីធ្វើការឃាត់ខ្លួនជនសង្ស័យរួចមក សមត្ថកិច្ច បានបញ្ជូនទៅកាន់អធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងចាត់ការបន្តតាមនីតិវិធីច្បាប់៕