ភ្នំពេញ៖ កម្លាំងគណ:បញ្ជាការឯកភាពសង្កាត់ចោមចៅ លោក សុទ្ធ សាធបានចុះទៅធ្វើការបង្ក្រាបសង្វៀនជល់មាន់មួយ កន្លែង ដែលមានបង្កប់វង់ល្បែងអាប៉ោង បៀរនៅក្នុងនោះផងដែរ ដែលមានទីតាំងស្ថិតនៅក្នុងភូមិថ្មគោល សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ កាលពីវេលាម៉ោង៣និង៣០នាទីរសៀល ថ្ងៃទី២៨ ខែធ្នូ ឆ្នាំ២០១៦ ដោយបានរឹបអូសបាន មាន់គោកងាប់១ក្បាល និងកម្រាលព្រមទាំងចាន អាប៉ោងមួយឈុតផងដែរ។
អាជ្ញាធរបាននិយាយថា សង្វៀនជល់មាន់ខាងលើនោះ បានបើកលេងដោយលួចលាក់ មួយរយ:ពេលមកហើយដោយមានមនុស្សចូលលេងច្រើន ដោយក្រុមអ្នកញៀនល្បែងខាងលើនោះ ម្នាក់ៗមានការភ្នាល់ចាញ់ យ៉ាងផ្កាប់មុខ ខ្លះអស់លុយ ខ្លះអស់ម៉ូតូ ដែលជាការព្រួយបារម្ភខ្លាចមានអំពើហឹង្សា និងចោរកម្មចេញពី ទីនោះដើម្បីអនុវត្តឲ្យបាននៅគោលនយោបាយ ភូមិសង្កាត់មានសុវត្ថិភាព ទើបអាជ្ញាធរបានដាក់កម្លាំង ចុះទៅធ្វើការស្រាវជ្រាវ ហើយដោយមានការសហការណ៏យ៉ាងល្អពីសំណាក់ប្រជាពលរដ្ឋនៅក្នុងមូលដ្ឋាន ទើបបានដឹងថាមានសង្វៀនជល់មាន់មួយនោះកំពុងបើកលេង ហើយក៏បានចុះទៅបង្ក្រាបតែម្ដង។
ប្រភពដដែលបានបន្តថា អ្វីដែលគួរឲ្យសោកស្ដាយនោះ គឺទីតាំងល្បែងខាងលើ ហាក់មានកម្លាំងបង្កប់ និយាយរួមគឺមានរនុកក្នុង ចាំឲ្យការណ៏ដល់ម្ចាស់សង្វៀន និងអ្នកដែលចូលទៅលេងនៅទីនោះ ព្រោះនៅពេល ដែលកម្លាំងចុះទៅដល់ ស្រាប់តែទាំងក្រុមអ្នកញៀនល្បែង និងមេសង្វៀនបាននាំគ្នារត់គេច ខ្លួនយ៉ាងរហ័សបំផុតដោយបានបន្សល់ទុកនៅកន្លែងកើតហេតុ នៅខ្មោចមាន់គោកមួយក្បាល ដែលបានជល់ចាក់ គ្នាងាប់ រួមជាមួយកម្រាលនិងចានបាញ់អាប៉ោង១ឈុតផងដែរ មិនតែប៉ុណ្ណោះ ក្រុមអ្នកចូលទៅលេងនៅទីនោះ បានយកយានជំនិះរបស់ខ្លួនមានម៉ូតូ និងរថយន្តទៅទុកនៅកន្លែងផ្សេង រួចនាំគ្នាដើទៅលេង លុះពេលកម្លាំងចុះទៅចាប់ពួកគេរត់តែខ្លួនទៅដោយមិនបានបន្សល់ទុកយានជំនិះ នៅកន្លែងនោះដូចពេលមុនៗទៀតឡើយ។
លោកចៅសង្កាត់ចោមចៅ បាននិយាយថា សង្កាត់របស់លោកនិងធ្វើការចុះបង្ក្រាបរហូត តាមបែបភ្លៀងរលឹម មិនអនុញ្ញាតឲ្យកើតមានតទៅទៀត ដោយដឹងហើយមិនបង្ក្រាបនោះឡើយ ហើយប្រសិនបើបងប្អូនប្រជាពលរដ្ឋទាំងអស់បានដឹងថា មានសង្វៀនជល់មាន់និងល្បែងស៊ីសង នៅកន្លែងណាសូមជួយផ្ដល់ព័ត៌មានផង ដើម្បីលោកបានចាត់កម្លាំងទៅបង្ក្រាបទាន់ពេលវេលា និងបានកាត់ បន្ថយរាល់បទល្មើសនានានៅនៅក្នុងមូលដ្ឋានសង្កាត់ចោមចៅ៕
មតិយោបល់