បាត់ដំបងៈ កម្លាំងអធិការដ្ឋាននគរបាលស្រុកសំពៅលូន ដឹកនាំកម្លាំងដោយលោក​វរសេនីយ៍ទោ​ ពេជ្រ​ សារ៉ែន​ អធិការនគរបាលស្រុក បានចុះបង្ក្រាប និងឃាត់ខ្លួនយុវជន២នាក់ បន្ទាប់ពីពួកគេធ្វើសកម្មភាពគាស់តូប​លួចយកទូរសព្ទដៃនៅចំណុចភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង កាលពីវេលាម៉ោង​ប្រហែល៤ទៀបភ្លឺថ្ងៃទី៣០ ខែធ្នូ ឆ្នាំ២០១៦។

អធិការនគរបាលស្រុក បានឲ្យដឹងថា ជនសង្ស័យទី១/ឈ្មោះ លឿង​ ពិសី ភេទប្រុស​ អាយុ​១៦ឆ្នាំ និងទី២/ឈ្មោះ រ៉ា​ បូរី ភេទប្រុស​ អាយុ១៥ឆ្នាំ អ្នកទាំងពីរ មានទីលំនៅភូមិឃុំកើតហេតុ​។

អធិការនគរបាលស្រុកបានបន្តថា ក្រោយឃាត់ខ្លួន កម្លាំងរបស់លោកបានដក​ទូរសព្ទដៃចំនួន​៣៣គ្រឿង​ រួមមាន៖ iphone ៣គ្រឿង samsung 9 គ្រឿង Huewei ២គ្រឿង oppo៣គ្រឿង meizu ៥ គ្រឿង camfone ៨គ្រឿង sintel ៣ គ្រឿង។ បន្ទាប់ពីដកហូត ទូរសព្ទទាំងនោះបានប្រគល់ជូនម្ចាស់ដើមវិញ។

បច្ចុប្បន្នជនសង្ស័យទាំងពីរនាក់ខាងលើ ត្រូវកម្លាំងបញ្ជូនទៅស្នងការនគរបាលខេត្ត ដើម្បីកសាងសំណុំរឿងចាត់ការតាមនីតិវិធីច្បាប់៕