ភ្នំពេញៈ ជនសង្ស័យពាក់ព័ន្ធប្រើប្រាស់គ្រឿងញៀនម្នាក់ ត្រូវបានកម្លាំងនគរបាលប៉ុស្តិ៍រដ្ឋបាលឃ្មួញ ធ្វើការឃាត់ខ្លួន និងដកហូតបានសម្ភារៈប្រើប្រាស់មួយចំនួន កាលពីម៉ោង១១និង៣០នាទីព្រឹកថ្ងៃទី៣ ខែមករា ឆ្នាំ២០១៧ នៅចំណុចផ្ទះជនសង្ស័យផ្លូវលំ ក្រុម០៦ ភូមិសែនសុខ១ សង្កាត់ឃ្មួញ ខណ្ឌសែនសុខ រាជធានីភ្នំពេញ។
ក្នុងប្រតិបត្តិការនេះ ដឹកនាំផ្ទាល់ដោយលោកអនុសេនីយ៍ឯក ញាណ នន នាយប៉ុស្តិ៍ និងលោកអនុសេនីយ៍ទោ សៅ ថន នាយរងប៉ុស្តិ៍ ក្រោមការបញ្ជាពីលោកវរសេនីយ៍ឯក ម៉ក់ ហុង អធិការខណ្ឌ និងមានការសម្របសម្រួលពីលោកព្រះរាជអាជ្ញារងអមសាលាដំបូងរាជធានីភ្នំពេញផងដែរ។
ជនសង្ស័យឈ្មោះ ឈឿន សុភ័ស្ស អាយុ៣០ឆ្នាំ មុខរបរមិនពិតប្រាកដ ស្នាក់នៅភូមិសែនសុខ១ សង្កាត់ឃ្មួញ ខណ្ឌសែនសុខ មានស្រុកកំណើតសង្កាត់ផ្សារដេប៉ូ៣ ខណ្ឌទួលគោក។
សមត្ថកិច្ចបានប្រាប់ថា មុនឈានដល់ការឃាត់ខ្លួនជនសង្ស័យខាងលើ គឺកម្លាំងសមត្ថកិច្ចបានធ្វើការស្រាវជ្រាវតាមជំនាញ ទើបឈានទៅឃាត់ខ្លួនជនខាងលើដល់ផ្ទះ និងដកហូតសម្ភារៈប្រើប្រាស់គ្រឿងញៀនមួយចំនួន រីឯជនសង្ស័យម្នាក់ទៀតបានគេចខ្លួន មុនសមត្ថកិច្ចទៅដល់។
នៅចំពោះមុខសមត្ថកិច្ចជនសង្ស័យបានប្រាប់ថា សម្ភារៈប្រើប្រាស់គ្រឿងញៀន ដែលសមត្ថកិច្ចដកហូតនេះ មិនមែនជារបស់ខ្លួនឡើយ គឺរបស់ប្អូន តែបច្ចុប្បន្នប្អូនគាត់ ត្រូវបានសមត្ថកិច្ចចាប់ដាក់ពន្ធធនាគាព្រៃសចំនួន៦ខែហើយមិនទាន់ចេញទេ ដោយជាប់ចោទ ពីបទប្រើប្រាស់ និងជួញដូរគ្រឿងញៀន។
បច្ចុប្បន្នជនសង្ស័យ ត្រូវបានឃាត់ខ្លួនជាបណ្តោះអាសន្ននៅអធិការដ្ឋាននគរបាលខណ្ឌសែនសុខ ដើម្បីសាកសួរបន្ថែម៕
មតិយោបល់