ភ្នំពេញៈ ជនសង្ស័យជួញដូរគ្រឿងញៀនម្នាក់ ត្រូវបានកម្លាំងនគរបាលខណ្ឌច្បារអំពៅ សហការជាមួយនគរបាលប៉ុស្តិ៍ព្រែកប្រា ឃាត់ខ្លួន ខណៈរូបគេកំពុងតែធ្វើសកម្មភាពជួញដូរគ្រឿងញៀនជាក់ស្តែង និង​ដកហូតបានថ្នាំញៀនចំនួន៨កញ្ចប់ផងដែរ។

ការឃាត់ខ្លួននេះ បានធ្វើឡើងកាលពីវេលាម៉ោង១០និង៣០នាទីព្រឹកថ្ងៃទី៣ ខែមករា ឆ្នាំ២០១៦ នៅចំណុចខាងមុខដីឡូតិ៍គ្មានលេខ ផ្លូវ៣៦៩ ភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។

ប្រភពព័ត៌មានបានប្រាប់ឱ្យដឹងថា បុរសដែលបានឃាត់ខ្លួនមានឈ្មោះ មេត សាក់គីរីន អាយុ៣០ឆ្នាំ ជនជាតិខ្មែរឥស្លាម មុខរបរមិបពិតប្រាដក ស្នាក់នៅផ្ទះលេខ៥៤ ភ៦ ផ្លូវ៣៦៩ ភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ។ មុនពេលកើតហេតុ ខណៈកម្លាំងនគរបាលខណ្ឌច្បារអំពៅ សហការជាមួយនគរបាលប៉ុស្តិ៍ព្រែកប្រា ចេញល្បាត ក៏បានប្រទះឃើញជនសង្ស័យនៅចំណុចខាងលើ ក៏បានហៅធ្វើការសួរនាំ និងឆែកឆេររក​ឃើញមានថ្នាំញៀនប្រភេទម្សៅក្រាមពណ៌សថ្លា៨កញ្ចប់តូច រួមទាំងឧបករណ៍ប្រើប្រាស់មួយចំនួនទៀតផង ក៏ធ្វើការឃាត់ខ្លួនតែម្តង។

ក្រោយពេលឃាត់ខ្លួន ជនសង្ស័យ រួមទាំងវត្ថុតាងថ្នាំញៀន ក៏ត្រូវបាននាំមកធ្វើការសាកសួរ និងកំណត់ហេតុនៅនគរបាលប៉ុស្តិ៍ព្រែកប្រា ដើម្បីប​ញ្ជូនខ្លួនទៅកាន់អធិការដ្ឋាននគរបាលខណ្ឌច្បារអំពៅចាត់ការទៅតាមផ្លូវច្បាប់៕