ស្ទឹងត្រែង: មានករណីគ្រោះថ្នាក់ចរាចរណ៍ រវាងរថយន្តស៊េរីទំនើប២គ្រឿង ដែលគេដឹងថារថយន្ត Lexus RX300 ជារបស់ថៅកែកាប់គោ និងរថយន្ត Land Cruiser ជារបស់លោកអភិបាលរងខេត្ត ស្ទឹងត្រែង នៅចំណុចក្រោយដំណាក់ ភូមិព្រែក សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង នាវេលាម៉ោង១២និង១៨នាទី យប់ថ្ងៃទី៦ ខែឧសភា ឆ្នាំ២0១៦នេះ។

តាមប្រភពពិសមត្ថកិច្ចបានឲ្យដឹងថា អ្នកបើកបររថយន្ត Lexus RX300 ពណ័ស្ករ ឈ្មោះ សុខ សំអាត ភេទប្រុស អាយុ៤៤ឆ្នាំ មុខរបរកាប់គោ ស្រុងស្ទឹងត្រែង ខេត្តស្ទឹងត្រែង រថយន្តពាក់ស្លាកលេខ 2AE-8711 បើកបរក្នុងទិសដៅ ពីលិចទៅកើត ដែលក្នុងរថយន្តមានមនុស្ស ៦នាក់ ស្រី៤នាក់ បានទៅបុករថយន្ត Land Cruiser របស់លោក ដួង ពៅ អភិបាលរងខេត្តស្ទឹងត្រែង ពណ័ខ្មៅ ពាក់ស្លាកលេខរដ្ឋ36 2-0512 បើកបរក្នុងទិសដៅ ពីជើងទៅត្បូង ឲ្យផ្ទុះពោង ហើយជ្រុលទៅបុករោងជាងម៉ូតូមួយកន្លែងទៀត បណ្តាលឲ្យខូចខាតរថយន្តទាំងសងខាង តែគ្មានអ្នកណារងរបួសនោះទេ។

ប្រជាពលរដ្ឋដែលរស់នៅកន្លែងកើតហេតុ បានប្រាប់ថា ម្ចាស់រថយន្តទាំងសងខាង បើកបរក្នុងស្ថានភាពស្រវឹង ដែលទំនងជាទើបតែចេញពីពិធីមង្គលការដូចគ្នា។ ប្រជាពលរដ្ឋបន្តថា
ម្ចាស់រថយន្ត Lexus មិនព្រមដោះស្រាយតាមសម្រួលទេ នៅនឹងកន្លែង ដោយអាងថាប្តីខ្លួនឯងមានស៍ក្តិ មានអំណាច។

បច្ចុប្បន្ន រថយន្តទាំង២ ត្រូវបានសមត្ថកិច្ចបានស្ទួចយកមកដាក់ក្នុង ស្នងការខេត្តស្ទឹងត្រែង ដោះស្រាយតាមនីវិធីបន្ត ក្រោយពីសមត្ថកិច្ចបានទុកពេលម្ចាស់រថយន្តទាំង២ ដោះស្រាយនៅនឹងកន្លែង៕