កំពតៈ កម្លាំងមន្ទីរយុត្តិធម៌នៃកងរាជអាវុធហត្ថខេត្តកំពត ដឹកនាំដោយលោកវរសេនីយ៍ទោ ហែម ចាន់ដារ៉ា មេបញ្ចាការរង និងជាប្រធានមន្ទីរយុត្តិធម៌នៃកងរាជអាវុធហត្ថខេត្ត និងសម្រប​សម្រួលដោយលោក ខៃ សម្ផស្ស ព្រះរាជអាជ្ញារងអមសាលាដំបូងខេត្តកំពត កាលពីវេលាម៉ោង៥និង៣៥នាទីល្ងាចថ្ងៃទី៥ ខែមករា ឆ្នាំ២០១៧ ម្សិលមិញបានចុះបង្ក្រាបមុខសញ្ញាជួញដូរ និងប្រើប្រាស់គ្រឿងញៀន ឃាត់ខ្លួនជនសង្ស័យ៣នាក់ នៅចំណុច ភូមិក្រាំង សង្កាត់ក្រាំងអំពិល ក្រុងកំពតខេត្តកំពត។

លោកវរសេនីយ៍ទោ ហែម ចាន់ដារ៉ា មេបញ្ជាការរង ដែលដឹកនាំប្រតិបត្តិការនេះ បានបញ្ជាក់​ថា ជនសង្ស័យទី១មានឈ្មោះ ហុង ស៊ីថា ហៅ ពៅ ភេទប្រុស អាយុ២៩ឆ្នាំ មុខរបរ មិនពិតប្រាកដ ទី២ឈ្មោះ អ៊ុក សិលា ហៅពៅ ភេទប្រុស អាយុ២៧ឆ្នាំ មុខរបរ ជាងឈើ និងទី៣ឈ្មោះ អ៊ុក វិចិត្រ ហៅតូ ភេទប្រុស អាយុ៣៥ឆ្នាំ មុខរបរ ជាងឈើ​ដូចគ្នា ទាំងបីនាក់ស្នាក់នៅទីតាំងខាងលើ។

វត្ថុតាងដែលដកហូតបានរួមមាន ៖ គ្រឿងញៀន២កញ្ចប់តូច មានទម្ងន់ស្មើនឹង 1,35 ក្រាមនិងម៉ូតូ១គ្រឿងម៉ាក zusuki គ្មានស្លាកលេខ។

បច្ចុប្បន្នជនសង្ស័យទាំង៣នាក់ រួមនឹងវត្ថុតាង សមត្ថកិច្ចកំពុងសាកសួរ និងឃុំខ្លួនបណ្ដោះ​អាសន្ននៅបញ្ជាការដ្ឋានកងរាជអាវុធខេត្ត ដើម្បីចាត់ការបន្តតាមនីតិវិធី៕