ភ្នំពេញៈ ស្ត្រីម្នាក់ ត្រូវបានកម្លាំងនគរបាលព្រហ្មទណ្ឌខណ្ឌមានជ័យ ឆែកឆេរក្នុងកាបូបលុយរកឃើញគ្រឿងញៀន១២កញ្ចប់ ខណៈដែលប្តីចោរម្សៀត បានលាក់ថ្នាំញៀនក្នុងកាបូប រួចប្រាប់ប្រពន្ធថាទុកលុយឲ្យផង ហើយក៏គេចខ្លួនបាត់។

ហេតុការណ៍នេះបានកើតឡើងកាលពីវេលាម៉ោង៥ល្ងាច ថ្ងៃទី៥ ខែធ្នូ ឆ្នាំ២០១៧ ស្ថិតនៅចំណុចបន្ទប់ជួល ផ្លូវបេតុង ភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

ជនសង្ស័យដែលចាប់ខ្លួនបានខាងលើមាន ឈ្មោះ ខុន សាលិន ភេទស្រី អាយុ២០ឆ្នាំស្នាក់នៅបន្ទប់ជួលខាងលើ មុខរបរកម្មកររោងចក្រ មានស្រុកកំណើតនៅភូមិថ្មពូន ឃុំត្រពាំងបឹង ស្រុកព្រៃឈរ ខេត្តកំពង់ចាម។ ចំណែកលោកប្តី ចោរម្មៀតដែលនាំទុក្ខឲ្យប្រពន្ធកូននោះ មានឈ្មោះ វ៉ាន់ វាសនា អាយុ២៥ឆ្នាំ បានរត់គេចខ្លួនបាត់ ទុកឲ្យប្រពន្ធត្រូវសមត្ថកិច្ចចាប់ខ្លួន និងចំណែកកូនតូចដែលទើបតែមានអាយុ៥ខែត្រូវឃ្លាតឆ្ងាយពីម្តាយ។

បច្ចុប្បន្នស្ត្រីជាជនសង្ស័យខាងលើ រួមនិងវត្ថុតាងត្រូវបានបញ្ជូនទៅកាន់អធិការដ្ឋាននគរបាលខណ្ឌមានជ័យ ដើម្បីកសាងសំណុំរឿង បញ្ជូនទៅកាន់សាលាដំបូងរាជនីភ្នំពេញ ចាត់ការតាមនីតិវិធិច្បាប់៕

https://youtu.be/KwBEaU4Se9w