ព្រៃវែងៈ គ្រោះថ្នាក់ចរាចរណ៍មួយបង្កឡើង រថយន្តដឹកទឹកផ្លែឈើរបស់ក្រុមហ៊ុន Fency ម៉ាកគា មួយគ្រឿង បានបើកទៅបុកម៉ូតូគុបមូលដឹកមេតាប៉ែ យ៉ាងពេញទំហឹង រួចកិនពីលើជនរងគ្រោះបណ្តាលឲ្យស្លាប់ភ្លាមៗយ៉ាងអាណោចអាធ័ម។

ហេតុការណ៍នេះបានកើតឡើងកាលពីវេលាម៉ោង៩ជាង ព្រឹកថ្ងៃទី១១ ខែមករា ឆ្នាំ២០១៧ ស្ថិតនៅចំណុចតាមបណ្តោយផ្លូវជាតិលេខ​១ ចន្លោះគីឡូម៉ែត្រលេខ៦៩-៧០ ភូមិព្រៃខ្លា ឃុំកំពង់សឹង ស្រុកព្រះស្ដេច ខេត្តព្រៃវែង។

ជនរងគ្រោះមានឈ្មោះ ស្ងួន នឿន ភេទប្រុស អាយុ៥៧ឆ្នាំ ស្នាក់នៅភូមិព្រៃផ្តៅ ឃុំស្តៅកោង ស្រុកបាភ្នំ ខេត្តព្រៃវែង ជាអ្នកបើកបរម៉ូតូ។

ប្រភពព័ត៌មានបានឲ្យដឹងថា មុនពេលកើតហេតុ គេបានឃើញរថយន្តម៉ាកគា ពណ៌ស ភ្នំពេញ 2W-6342 មួយគ្រឿង ដឹកទឹកផ្លែឈើរបស់ក្រុមហ៊ុន Fency ពេញលើរថយន្ត ធ្វើដំណើរតាមបណ្តោយផ្លូវខាងលើ ក្នុងទិសដៅពីលិចទៅកើតបញ្ច្រាសទិសគ្នា​ លុះបានមកដល់ចំណុចកើតហេតុ ស្រាប់តែរថយន្តបង្កបានបត់ឆ្វេង កៀរម៉ូតូម៉ាក គុបមូល ពណ៌ស្លែ ពាក់ស្លាកលេខ ព្រៃវែង 1A-1674 ដែលកំពុងបើកបរដោយបុរសម្នាក់ដឹកមេតាប៉ែ បណ្តាលឲ្យដួល ជាន់ហ្វ្រាំងមិនទាន់កិនចំក្បាលរបស់ជនរងគ្រោះដែលជាអ្នកបើកម៉ូតូ បណ្តាលឲ្យធ្លាយខួរស្លាប់យ៉ាងអាណោចអាធ័មនៅនឹងកន្លែងកើតហេតុ។ ចំណែករថយន្តបង្ក ក្រឡាប់ផ្ងារជើងចាក់កេះទឹកផ្លែឈើ ចោលពេញលើដងផ្លូវ ។ រីឯអ្នកបើកបររថយន្ត គេចខ្លួនបាត់ស្រមោល ។

ក្រោយពីកើតហេតុ សមត្ថកិច្ចបានដឹកនាំកម្លាំងជំនាញ ចុះមកធ្វើការពិនិត្យនិងវាស់វែងដល់កន្លែងកើតហេតុផងដែរ៕