ភ្នំពេញ: លោកប៊ុន សេរីអភិបាលរងរាជធានីភ្នំពេញ សម្តេចព្រះមហាសុមេធាធិបតីកិត្តិឧទ្ទេសបណ្ឌិត នន្ទ ង៉ែត សម្តេចព្រះសង្ឃនាយក នៃព្រះរាជាណាចក្រកម្ពុជា និងសម្តេចព្រះពោធិវង្សកិត្តិឧទ្ទេសបណ្ឌិត អំ លឹមហេង ព្រះសង្ឃនាយករង ទី២ នៃព្រះរាជាណាចក្រកម្ពុជា នៅព្រឹកថៃ្ងទី០៨ ខែឧសភា ឆ្នាំ២០១៦នេះ បាននិមន្តនិងអញ្ជើញជាអធិបតីភាពក្នងពិធីប្រកាសតែងតាំង និងស្រង់សុគន្ធវារីមន្ត្រីសង្ឃព្រមទាំងសម្ពោធដាក់ឱ្យប្រើប្រាស់ក្លោងទ្វារវត្តយសសុវណ្ណរាម ហៅវត្តឫស្សីស្រស់ នៅសង្កាត់និរោធ ខណ្ឌច្បារអំពៅ ។
បើតាមការបញ្ជាក់ពីលោកអភិបាលរងខណ្ឌព្រែកព្នៅបានឲ្យដឹងថា របងនិងក្លោងទ្វាវត្តដែលត្រូវឆ្លងឲ្យប្រើប្រាស់នេះ ក្នុងនោះរួមមានរបងប្រវែង៦៦៥ម៉ែត្រ ក្លោងទ្វាវត្តកម្ពស់១១ម៉ែត្រ ទទឹង១០ម៉ែត្រ សរុបជាទឹកប្រាក់ចំនួន២៨៥០០ដុល្លាអាមេរិក ហើយក្នុងពិធីនេះក៏បាន ប្រកាសតែងតាំង និងស្រង់ព្រះសុគន្ធវារីដល់ព្រះចៅអធិការអមរាភិរក្ខិត នៅ ណន គ្រូសូត្រស្តាំឥន្ទញាណោ តុល ថុន និងគ្រូសូត្រឆ្វេងឥន្ទប្បញ្ញោ វឿន សារឿនផងដែរ។
លោកប៊ុន សេរីបានមានប្រសាសន៍លើកឡើងថា សមិទ្ធផលទាំងនេះ គឺបានសបញ្ជាក់ឱ្យឃើញពីការសាមគ្គីភាពគ្នា ប្រកប ដោយជំនឿជាក់លើព្រះពុទ្ធសាសនា ដោយប្រមូលផ្តុំបានកម្លាំងសរុបយ៉ាងធំ ឈានទៅរួមចំណែកយ៉ាងសកម្ម ក្នុងការលើកកម្ពស់តម្លៃ និងអភិវឌ្ឍព្រះពុទ្ធសាសនា ក៏ដូចជាសង្គមជាតិទាំងមូល ឲ្យកាន់តែរីកចម្រើនទ្វេឡើងថែមទៀត ។
វត្តអារាម និងព្រះពុទ្ធសាសនារបស់យើង បានដើរតួនាទីជាស្នូល យ៉ាងសំខាន់ នៃវប្បធម៌សន្តិភាពដែលប្រជាជនយើងបានផ្តល់តម្លៃយ៉ាង ខ្ពស់ បាននិងកំពុងពង្រឹងឱ្យក្លាយទៅជាសីលធម៌សង្គមដ៏ល្អ សម្រាប់ ប្រជាជនកម្ពុជាយើង។
លោកបន្តថា សាមគ្គីភាពរឹងមាំនៃពុទ្ធសាសនិក គឺជាមាគ៌ាដ៏ប្រពៃ នាំយើងទាំងអស់គ្នាទៅដល់គោលដៅដ៏ពិសិដ្ឋមួយ ដែលជា បំណង និងសេចក្តីត្រូវការរបស់សង្គមជាតិយើង គឺលុបបំបាត់អំពើហិង្សាប្រទូស្តរាយ ឈ្នានិស ការប្រព្រឹត្តអំពើទុច្ចរិត អនាចារ្យផ្សេងៗ ។ល។ ហើយនាំមកនូវភាពសុខុដុមរមនាក្រោមពន្លឺដ៏ភ្លឺនៃព្រះធម៌របស់ព្រះពុទ្ធជាម្ចាស់ ។
ដើម្បីចូលរួមជាសទ្ធាដ៏ជ្រះថ្លា ក្នុងឱកាសនោះលោកប៊ុន សេរីក៏បាននាំយកបច្ច័យរបស់លោកប៉ា សុជាតិវង្ស អភិបាល នៃគណ:អភិបាលរាជធានីភ្នំពេញ និងលោកជំទាវចំនួន ១០លានរៀលប្រគេនដល់ព្រសង្ឃក្នុងទីអារាមវត្តខាងលើផងដែរ៕
មតិយោបល់