ស្វាយរៀងៈ ករណីហិង្សារមួយបានកើតឡើង បន្ទាប់ពីក្មេងស្ទាវមួយក្រុម ជិះម៉ូតូដួល ខឹងនឹងកម្មករបើករីវឺល័រ ផ្ទុះហិង្សាដេញវាយគ្នាពេញការដ្ឋាន បណ្តាលឲ្យមនុស្ស៣នាក់រងរបួសធ្ងន់យ៉ាងធ្ងន់ធ្ងរ ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះបានកើតឡើងកាលពីវេលាម៉ោង១ និង២០នាទី រសៀលថ្ងៃទី២៧ ខែមករា ឆ្នាំ២០១៧ ស្ថិតនៅចំណុច ភូមិចំបក់ សង្កាត់ចេក ក្រុងស្វាយរៀង ខេត្តស្វាយរៀង ។

សមត្ថកិច្ចបានឲ្យដឹងថា ភាគីខាងក្រុមក្មេងស្ទាវមានគ្នា៣នាក់ ទី១មានឈ្មោះ សុខ សុផល ហៅ ប្រេះ ភេទប្រុស អាយុ២៦ឆ្នាំ មុខរបរផ្សារដែក។ ទី២ឈ្មោះ សុខ ភក្តី ហៅទិត ភេទប្រុស អាយុ២២ឆ្នាំ មុខរបរផ្សារដែក និងទី៣ឈ្មោះ អ៊ុក សោភា ហៅយ៉ាវ ភេទប្រុស អាយុ២៩ឆ្នាំ មុខរបរផ្សារដែក។អ្នកទាំង៣ រស់នៅភូមិចំបក់ សង្កាត់ចេក ក្រុងស្វាយរៀង ដូចគ្នា ។

ចំណែកក្រុមកម្មករធ្វើផ្លូវ មានគ្នា៣នាក់ដូចគ្នា ទី១ឈ្មោះ ង៉ូយ បេន ភេទប្រុស អាយុ ២៤ ឆ្នាំ មុខរបរជាងឡាន រស់នៅភូមិ ព្រៃញាត ឃុំប្រធាតុ ស្រុកកំពង់ត្របែក ខេត្តព្រៃវែង។ ទី២ឈ្មោះ កឹម សាក់ ហៅធួន ភេទប្រុស អាយុ២៥ឆ្នាំ មុខរបរបើកបរ រស់នៅភូមិ កោះប៉ែន ឃុំកោះមិត្ត ស្រុកកំពង់សៀម ខេត្តកំពង់ចាម ។
និងទី៣ឈ្មោះ សូ វណ្ណី ហៅឈុន ភេទប្រុស អាយុ៣២ឆ្នាំ មុខរបរបើកបរ រស់នៅភូមិត្របែក ឃុំស្វាយជ្រំ ស្រុកស្វាយជ្រំ។

មុនពេលកើតហេតុ គេបានឃើញក្រុមក្មេងស្ទាវ ជិះម៉ូតូដួល ខណៈនោះក៏ខឹងនឹងកម្មករបើករីវឺល័រធ្វើផ្លូវ បង្កជាហិង្សាដេញវាយកម្មកទាំងនោះតែម្តង ដោយខាងកម្មករបានរត់ចូលការដ្ឋានយកសោរកាន់នៅដៃ រីឯក្រុមក្មេងស្ទាវយកដែកទីបកាន់ដែរ ហើយក៏វាយគ្នាទៅវិញទៅមក រហូតបណ្តាលឲ្យភាគីខាងកម្មករបែកកញ្ចក់រថយន្ត ២គ្រឿង របួសកម្មករម្នាក់ ចំណែកភាគីក្រុមក្មេងស្ទាវ មានរបួសក្បាល៣នាក់ត្រូវបានគេបញ្ជូនទៅសង្គ្រោះនិងព្យាបាលនៅមន្ទីរពេទ្យបង្អែកខេត្តស្វាយរៀង។

បច្ចុប្បន្នចំពោះក្រុមក្មេងស្ទាវខាងលើ សមត្ថកិច្ចកំពុងសាកសួរ និងកសាងសំណុំរឿងបញ្ជូនខ្លួនទៅកាន់តុលាការ ដោះស្រាយគ្នាតាមផ្លូវច្បាប់៕