ភ្នំពេញៈ បុរសពិការដៃម្ខាងពីកំណើតម្នាក់ អួតថាជាវិស្វករសំណង់ មានប្រពន្ធនិងកូនរួចទៅហើយ ប៉ុន្តែបែរជាលួចមានទំនាក់ទំនងស្នេហាជាមួយនាងក្រមុំ ជាកម្មការិនីរោងចក្រកាត់ដេរម្នាក់ទៀត ដោយបានកុហកថា ខ្លួននៅកំលោះ មានឪពុកម្ដាយជាអនីជនខ្មែរ រស់នៅអាមេរិចទៀតផង ទើបធ្វើឲ្យនាងទុកចិត្ត ជឿទុកចិត្ត នាងក្រមុំបានបូជាអ្វីៗទាំងអស់ជូនប្រុសព្រាននេះ ទីបំផុតទើបគ្មានអ្វីក្រៅពីទឹកភ្នែកនោះទេ ព្រោះអស់ទាំងស្រូវពូជ។

ការទាក់ទងស្នេហានោះ ដំបូងឡើយ គឺតាមរយៈបណ្ដាញសង្គមហ្វេសប៊ុក ប៉ុណ្ណោះ។ លុះក្រោយពីបង្កាត់ភ្លើងស្នេហ៍អូនបងតាមហ្វេសប៊ុកបានមួយរយៈពេលខ្លី ក៏បានឈានដល់ការណាត់ជួបគ្នារួមមេត្រីនៅក្នុងផ្ទះជួលខាងស្រី ដោយនាងក្រមុំព្រមប្រគល់ព្រហ្មចារី និងទ្រព្យសម្បត្តិមានលុយជាង១ពាន់ដុល្លារ និងម៉ូតូស្កុបពីមួយគ្រឿង ជូនប្រុសស្នេហ៍ដោយគ្មានការសោកស្ដាយ ព្រោះប្រុសស្នេហ៍បានសន្យាថា និងរៀបការជាមួយនាងនៅចុងខែមករា ឆ្នាំ២០១៧ ។

ប៉ុន្តែដល់ថ្ងៃកំណត់ត្រូវចូលរោងការ ស្រាប់តែប្រុសស្នេហ៍ប្រាប់ថា ម្ដាយនៅឯសហរដ្ឋអាមេរិចស្លាប់ មង្គលការត្រូវលុបចោល ទើបធ្វើឲ្យនាងអស់សង្ឃឹម ហើយនៅវេលាម៉ោង៨យប់ថ្ងៃទី២៧ មករា ក៏បាននាំជននោះទៅកាន់ប៉ុស្ដិ៍នគរបាលចោមចៅដាក់ពាក្យបណ្ដឹងពីបទរំលោភលើទំនុកចិត្តតែម្ដង។

ចំណែកប្រពន្ធ និងម្ដាយក្មេក ក៏បានបីកូនស្រីតូចជិះម៉ូតូរម៉កកង់បី១គ្រឿងទៅកាន់ប៉ុស្ដិ៍នគរបាលចោមចៅ ដោយប្រាប់ថា គាត់នឹងលែងលះប្ដីកំហូចនោះចោលផងដែរ។

វិស្វករសំណង់ម្នាក់នោះឈ្មោះ អឹម សុខជា អាយុ២៦ឆ្នាំ មានស្រុកកំណើតនៅក្នុងភូមិតាម៉ឺន ឃុំទួលអំពិល ស្រុកបរសេដ្ឋ ខេត្តកំពង់ស្ពឺ។ ជននេះត្រូវបានឪពុកម្ដាយស្លាប់ចោលអស់យូរណាស់ហើយ មានប្រពន្ធឈ្មោះ ចាន់ សំអាង អាយុ៣០ឆ្នាំ មានស្រុកកំណើតនៅក្នុងភូមិ អន្លង់ទ្រា ឃុំព្រះឥសី ស្រុកល្វាឯម ខេត្តកណ្ដាល ទើបសម្រាលកូនបានរយៈពេល១ខែកន្លះប៉ុណ្ណោះ ។

ចំណែកឯនាងក្រមុំអស់ព្រហ្មចារីអស់ទ្រព្យសម្បត្តិនោះ ឌី សុដាវណ្ណ អាយុ២៧ឆ្នាំ ជាកម្មការិនី រោងចក្រកាត់ដេរ នាងមានបងប្អូនចំនួន៨នាក់ ហើយនាងគឺជាកូនទី៨ ក៏ជាក្មេងកំព្រាផងដែរ សព្វថ្ងៃរស់នៅជាមួយបងប្អូន មានស្រុកកំណើតនៅក្នុងភូមិព្រៃស្នួល ឃុំកក់ ស្រុកបរសេដ្ឋ ខេត្តកំពង់ស្ពឺ បានស្នាក់នៅផ្ទះជួលក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ។

នៅពេលដែលជួបគ្នានៅប៉ុស្តិ៍ចោមចៅនាងក្រមុំសុំតែទ្រព្យសម្បត្តិរបស់នាងទៅវិញតែប៉ុណ្ណោះគឺលុយជាង១ពាន់ដុល្លារនិងម៉ូតូស្កុបពី របស់នាងត្រឡប់ទៅវិញចំពោះរឿងផ្សេងនាងមិនពាក់ព័ន្ធទេ៕