ភ្នំពេញៈ ជនសង្ស័យចំនួន២នាក់ ត្រូវបានកម្លាំងនគរបាលខណ្ឌទួលគោក ធ្វើការចាប់ខ្លួន នៅចំណុចទីតាំងផ្សេងគ្នា ពាក់ពន្ធ័នឹងករណី ជួញដូរ និងសម្រួលឲ្យប្រើប្រាស់នូវសារធាតុញៀនខុសច្បាប់ ដកហូតបានថ្នាំញៀន ១០កញ្ចប់ រួមនិងវត្ថុតាងមួយចំនួនធំ។

សមត្ថកិច្ចបានឲ្យដឹងថា ជនសង្ស័យទី១ឈ្មោះ ភិន ចាន់ភីរិទ្ធិ ហៅ ធា ភេទប្រុស អាយុ៤២ឆ្នាំ ជនជាតិខ្មែរមុខរបរ មិនពិតប្រាកដ ស្នាក់នៅផ្ទះ៣៥ ប.ស ផ្លូវរថភ្លើង ក្រុមទី៥៤ ភូមិ១៤ សង្កាត់បឹងកក់ទី១ ខណ្ឌទួលគោក រាជធានីភ្នំពេញ ។ ត្រូវបានសមត្ថកិច្ចខណ្ឌទួលគោក ធ្វើការចាប់ខ្លួន កាលពីវេលាម៉ោង ១០ ព្រឹកថ្ងៃទី ២ ខែកុម្ភៈ ឆ្នាំ២០១៧ ស្ថិតនៅចំណុច ផ្ទះដែលជនសង្ស័យស្នាក់នៅ ពាក់ពន្ធ័នឹងករណីជួញដូរគ្រឿងញៀនខុសច្បាប់ ដកហូតបាន ក្រាមពណ៌ថ្លា ចំនួន៩កញ្ចប់ ក្នុងនោះមានធំ២កញ្ចប់ និងតូច៧កញ្ចប់ សង្ស័យជាគ្រឿងញៀន , ទូរសព្ទ ៣គ្រឿង ម៉ាក Nokia 1616 ម៉ាក Seatel ពណ៌ស ខូច ,កូនកាបូបម៉ាក Nikon ពណ៌ខ្មៅ ចំនួន១ , ទុយោកែច្នៃ សម្រាប់ជក់គ្រឿងញៀន១ និងថង់ សម្រាប់ច្រកគ្រឿងញៀនមួយចំនួន។

ចំណែកជនសង្ស័យទី២ឈ្មោះ វិត ទឹងហាយ ហៅហាយ ភេទប្រុស អាយុ៥៤ឆ្នាំ ជនជាតិវៀតណាម មុខរបរទិញ- លក់អេតចាយ ស្នាក់នៅផ្ទះជួលលេខ៥៤ ភូមិរថភ្លើង ក្រុមទី៥៤ ភូមិ១៤ សង្កាត់បឹងកក់ទី១ ខណ្ឌទួលគោក ។ ត្រូវបានសមត្ថកិច្ចចាប់ខ្លួនពីបទ សម្រួលឲ្យប្រើប្រាស់នូវសារធាតុញៀនខុចច្បាប់ ឃាត់ខ្លួនកាលពីវេលាម៉ោង ១០ និង៣៥នាទី ថ្ងៃទី២ ខែកុម្ភៈ ឆ្នាំ២០១៧ ដកហូតបាន ក្រាមពណ៌សថ្លា ១កញ្ចប់តូច (សង្ស័យជាគ្រឿង ញៀន ), បំពង់កែវសម្រាប់ជក់គ្រឿងញៀន ចំនួន១ ,ដបកែច្នៃជាឧបរណ៍សម្រាប់ជក់គ្រឿងញៀន ១ , ដែកកេះហ្គាស ចំនួន៦។

បច្ចុប្បន្នជនសង្ស័យខាងលើ រួមនិងវត្ថុតាង កំពុងឃាត់ខ្លួនជាបណ្តោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរ និងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការតាមផ្លូវច្បាប់ ៕