ភ្នំពេញ:ជនសង្ស័យ ២នាក់ ឆ្ងាញ់ខាងឆក់ទូរស័ព្ទ ត្រូវសមត្ថកិច្ចកងរាជអាវុធហត្ថខណ្ឌ៧មករាក្របួចបានភ្លាមៗ ក្រោយពីធ្វើសកម្មភាពរួច កាលពីវេលាម៉ោង៨និង៣០នាទី យប់ថ្ងៃទី០៩ ខែឧសភា ឆ្នាំ២០១៦ នៅចំណុចផ្លូវលេខ២១៤ កែងផ្លូវ៩៣ សង្កាត់បឹងព្រលឹត ខណ្ឌ៧មករា។

សមត្ថកិច្ចបានឲ្យដឹងថា ជនសង្ស័យមានគ្នា ០២នាក់ ១-ឈ្មោះ គួច សៀវភីង ភេទប្រុស អាយុ១៨ឆ្នាំ ជនជាតិខ្មែរ មុខរបរបុគ្គលិកនៅសណ្ឋាគារធីហាវ ផ្នែកសំអាត មានទីលំនៅផ្ទះលេខ150E0 ផ្លូវលេខ63 សង្កាត់ចតុមុខ ខណ្ឌដូនពេញ និងទី២-ឈ្មោះ ផុន ចាន់ធូ ភេទប្រុស អាយុ២៥ឆ្នាំ ជនជាតិ ខ្មែរ មុខរបរពុំពិតប្រាកដ មានទីលំនៅម្ដុំសង់លីហ្សេ ខណ្ឌចំការមន។ វត្ថុតាងចាប់យករួមមាន ម៉ូតូ ១គ្រឿងម៉ាកស៊ុយស៊ួគីលេត ( SUZUKI Lets ) ពណ៏ស បិតស្កុតពណ៏ខ្មៅ ពាក់ស្លាកលេខភ្នំពេញ1BZ-6214។

សមត្ថកិច្ចបន្តថា មុនកើតហេតុ នៅម៉ោង៨និង៣០នាទី នៅចំនុចផ្លូវ២១៤ កែង៩៣ ក្នុងសង្កាត់បឹងព្រលឹត មានលលឺសំឡេងស្រែកថាចោរៗ ពេលនោះកម្លាំងល្បាត របស់កងរាជអាវុធហត្ថខណ្ឌ៧មករា បានមក ក៍ដេញតាមជនសង្ស័យទាំងពីរនាក់ ក៏ឈានដល់ឃាត់ខ្លួនបានតែម្ដង។ ដោយឡែកជនរងគ្រោះ ពីរនាក់ប្ដីប្រពន្ធ ពេលកម្លាំងកំពុងចាប់ជនសង្ស័យ គាត់បានជិះម៉ូតូចេញទៅបាត់។ បច្ចប្បន្នជនសង្ស័យទាំងពីរ និងសំភារៈ ( ម៉ូតូ០១គ្រឿង) បញ្ជូនទៅការិយាល័យព្រហ្មទណ្ឌអាវុធហត្ថក្រុង ដើម្បីអនុវត្តបន្តតាមនីតិវិធី៕