Post News Media ព័ត៌មានជាតិ កម្ពុជា នឹងប្...

កម្ពុជា នឹងប្រារព្ធមហោស្រពភាសា និងវប្បធម៌អន្តរជាតិ លើកទី ៣ ចុងសប្តាហ៍នេះ

ភ្នំពេញ: ប្រទេសកម្ពុជា នឹងមានការរៀបចំមហោស្រពភាសា និងវប្បធម៌អន្តរជាតិមួយ នៅឯមជ្ឈមណ្ឌលសន្និបាតទីក្រុង​កោះពេជ្រ រាជាធានីភ្នំពេញ ដោយមានការគាំទ្រពីក្រសួងវប្បធម៌ និងវិចិត្រសិល្ប: ក្រោមកិច្ចសហប្រតិបត្តិការ​រវាង សាលា​អន្តរជាតិហ្សាម៉ាន់ (ZIS) និងវិទ្យាស្ថាន សន្ទនាមេគង្គ (MDI) នៅថ្ងៃសោរ៍ ទី ២៥ ខែកក្កដា ចុងសប្តាហ៍នេះ ចាប់ពីម៉ោង ៩:០០ ព្រឹក ដល់ម៉ោង ៦:០០ ល្ងាច។

មហោស្រពដែលរៀបចំឡើងដោយអង្គការភាសា និងវប្បធម៌អន្តរជាតិ ហៅកាត់ថា ILCO នេះ ត្រូវបានបង្កើតឡើង​ដើម្បី​បង្ហាញ​នូវភាពរុងរឿងនៃវប្បធម៌របស់ប្រទេសកម្ពុជា ជាមួយនឹងប្រទេសអន្តរជាតិផ្សេងទៀត ហើយវាក៏ជាការ​បង្ហាញពី​រស​ជាតិនៃម្ហូបអាហារ វប្បធម៌ និងសិល្ប: របស់ជនជាតិខុសៗគ្នានៅក្នុងប្រទេសតែមួយផងដែរ។

មហោស្រពភាសា និងវប្បធម៌អន្តរជាតិ IFLC លើកទីបីនេះ នឹងប្រព្រឹត្តទៅក្រោមអធិបតីយភាព ឯកឧត្តម សោម សុគន្ធ រដ្ឋលេខាធិការក្រសួង វប្បធម៌ និងវិចិត្រសិល្ប: ឯកឧត្តម ប៉ាក សុខុម រដ្ឋលេខាធិការក្រសួង ទេសចរណ៍ ឯកឧត្តម ជា ជេដ្ឋ ប្រធានគណ:កម្មាធិការទី២ នៃព្រឹទ្ធសភា ឯកឧត្តម ម៉ាន់ ឈឿន ប្រធានគណ:កម្មាធិការទី៧ នៃព្រឹទ្ធសភា និងឯក​អគ្គរាជទូត តំណាងស្ថានទូត និងមន្ត្រីរាជការ អមដោយ ឯកឧត្តម អ៊ាង សុផល្លែត អគ្គនាយកកិត្តិយសក្រុមហ៊ុនហ្សាម៉ាន់ ខូអិលធីឌី។

មហោស្រពនេះដែរ នឹងមានតាំងស្តង់ចំនួន ៤៥ តំណាងឱ្យសិល្ប: និងវប្បធម៌ នៃប្រទេសនីមួយៗ ដែលបានចូលរួម ព្រមទាំងមានការសម្តែងផ្សេងៗនៅលើឆាក ពីសំណាក់អ្នករាំ អ្នកចម្រៀងជាតិ និងអន្តរជាតិ ជាច្រើនផ្សេងទៀត។

គួរបញ្ជាក់ថា ILCO គឺជាអង្គការក្រៅរដ្ឋាភិបាលមួយ ដែលមានគោលបំណងលើកកម្ពស់សេចក្តីសុខសន្តិភាព សេចក្តីស្រឡាញ់ និងការស្រង់យកបទពិសោធន៍ ពីវប្បធម៌នានាតាមរយ:សិល្ប: និងតន្ត្រី នៅព្រះរាជាណាចក្រកម្ពុជា៕