ព្រះសីហនុៈ ករណីគ្រោះថ្នាក់ចរាចរណ៍បង្កឡើងដោយជនជាតិបរទេស២នាក់ បើករថយន្តបុកម៉ូតូពីក្រោយពេញទំហឹង បណ្តាលឲ្យមនុស្ស២នាក់ស្លាប់ភ្លាមៗនៅនិងកន្លែងកើតហេតុ កាលពីវេលាម៉ោង២៣:៣៥នាទីនាថ្ងៃទី១០ឧសភា២០១៦ លើផ្លូវជាតិលេខ៤នៅចន្លោះគីឡូម៉ែត្រលេខ១៦៥និង១៦៦ ស្ថិតនៅភូមិតានៃ ឃុំជើងគោ ស្រុកព្រៃនប់ ខេត្តព្រះសីហនុ។

ប្រភពបានឲ្យដឹងថា ជនបរទេស២នាក់ បើករថយន្តម៉ាកRAV4 ពណ៌ខ្មៅ ស្លាកលេខភ.ព២F៩៤៤៦ អ្នកបើកបរឈ្មោះ OBIORA DOZIE FRANK ភេទប្រុស អាយុ៣២ឆ្នាំ សញ្ជាតិNIGERIAN (រងរបួលស្រាល) អ្នករួមដំណើរឈ្មោះ VZONDO FARIAN ភេទប្រុសអាយុ៣៣ឆ្នាំ សញ្ជាតិNIGERIAN (រងរបួសស្រាល)មានទិសដៅស្របគ្នាពីភ្នំពេញទៅក្រុងព្រះសីហនុមកដល់ចំណុចកើតហេតុខាងលើ រថយន្តមានល្បឿន ខណៈដល់ផ្លូវកោងបានបុកម៉ូតូពីក្រោយម៉ាកWAVE ពណ៌ខ្មៅគ្មានស្លាក់លេខ។

ប្រភពបានបន្តថា អ្នកបើកបរឈ្មាះ មៀច សារិន ភេទប្រុស អាយុ៥៧ឆ្នាំ បុខរបរកម្មករ មានទីលំនៅភូមិមនោរម្យ ឃុំជើងគោ ស្រុកព្រៃនប់ខេត្តព្រះសីហនុ (ស្លាប់នៅកន្លែងកើតហេតុ)។ អ្នករួមដំណើរម្នាក់ទៀត មិនទាន់ស្គាល់ឈ្មោះនិងអត្តសញ្ញាណ(ស្លាប់នៅកន្លែងកើតហេតុ)។

បច្ចុប្បន្នអ្នកបើកបររថយន្ត និងម៉ូតូប្រគល់ឲ្យនគរបាលស្រុកព្រៃនប់ចាត់ការតាមនិតិវិធីច្បាប់៕