ភ្នំពេញ: នគរបាលខណ្ឌឫស្សីកែវ បានបើកប្រតិបត្តិការចុះបង្ក្រាបទីតាំងជួញដូរ និងចែកចាយគ្រឿងញៀន មួយកន្លែង ដោយឃាត់ខ្លួនជនសង្ស័យប្រុសស្រី២នាក់ និងដកហូតថ្នាំញៀនចំនួន ៥៣កញ្ចប់តូចធំ កាលពីវេលាម៉ោង៤និង៣០នាទី ល្ងាចថ្ងៃទី១១ ខែមីនា ឆ្នាំ២០១៧នេះ ស្ថិតនៅចំណុចបន្ទប់ជួលលេខ១៣ ផ្លូវលេខ៩០៧ ក្រុម៣ ភូមិទួលសង្កែ សង្កាត់ទួលសង្កែ១ ខណ្ឌឫស្សីកែវ។

ជនសង្ស័យដែលឃាត់ខ្លួននោះទី១-ឈ្មោះ មាស សុភា ភេទប្រុស អាយុ១៩ឆ្នាំ មានមុខរបរសន្តិសុខដឺប្រេស និងទី២-ឈ្មោះ ឯក សំណាង ភេទស្រី អាយុ១៧ឆ្នាំ មានមុខរបរមិនពិតប្រាកដ បច្ចុប្បន្នអ្នកទាំង២នាក់ ស្នាក់នៅបន្ទប់ជួលលេខ១៣ ក្រុម៣ ភូមិទួលសង្កែ សង្កាត់ទួលសង្កែ១ ខណ្ឌឫស្សីកែវ។

សមត្ថកិច្ចបានឲ្យដឹងថា នៅក្នុងប្រតិបត្តិការនេះ គឺសមត្ថកិច្ចបានសហការជាមួយសមត្ថកិច្ចប៉ុស្តិ៍ទួលសង្កែ និងមានការសម្របសម្រួលពីលោក អ៊ុំ សុភ័ក្ត្រ ព្រះរាជអាជ្ញារងអមសាលាដំបូងរាជធានីភ្នំពេញ ហើយសមត្ថកិច្ចបានបើកប្រតិបត្តិការចុះបង្ក្រាបទីតាំងផ្ទះជួលមួយកន្លែង ដែលសង្ស័យថាជាទីតាំងជួញដូរ និងចែកចាយគ្រឿងញៀន។ ក្រោយពេលកម្លាំងសមត្ថកិច្ចយើងចុះបង្ក្រាបនោះ គឺបានឃាត់ខ្លួនជនសង្ស័យប្រុសស្រីចំនួន ២នាក់ ដោយបានដកហូតនៅម្សៅក្រាមពណ៌សថ្លាចំនួន ៥៣កញ្ចប់តូចធំ ដោយក្នុងនោះមាន ២កញ្ចប់ធំ ជញ្ជីងសម្រាប់ថ្លឹងគ្រឿងញៀនចំនួន១ ថ្លង់ប្លាស្ទិចសម្រាប់ច្រកគ្រឿងញៀនមួយចំនួន និងឧបករណ៍ប្រើប្រាស់គ្រឿងញៀនមួយចំនួន ហើយសមត្ថកិច្ចបានធ្វើការនាំខ្លួនជនសង្ស័យខាងលើទៅកាន់អធិការដ្ឋាន ដើម្បីធ្វើការសាកសួរ។

បច្ចុប្បន្នជនសង្ស័យប្រុសស្រីទាំង ២នាក់ខាងលើ រួមនិងវត្ថុតាង ត្រូវសមត្ថកិច្ចឃុំខ្លួនជាបណ្តោះអាសន្ន នៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងចាត់ការបន្តតាមនីតិវិធីច្បាប់៕