បន្ទាយមានជ័យៈ​ កាលពីយប់ថ្ងៃទី១១ខែមីនានេះ មានហេតុការណ៍ដ៏គួរឲ្យហួសចិត្តមួយ បានកើតឡើងដោយសមត្ថកិច្ចព្យាយាមរារាំង និងឃាត់រថយន្ត Lexus​RX300 មួយគ្រឿង ដែលត្រូវបានចោរលួចចេញពីស្រុកមង្គលបូរី មកដល់ទីរួមខេត្តបន្ទាយមានជ័យ។​

រថយន្ត Lexus ត្រូវបានបើកគេចពីការរារាំងរហូតមកដល់មុខសាលាខេត្ត បានបើកឡើងលើខឿនផ្លូវ ក៏ជ្រុលទៅបុកប៉ុស្តិ៍យាមបណ្តាលឲ្យដួលរាប ទើបរថយន្តទៅមុខលែងរួច។​ តែអ្វីដែលជារឿងដ៏គួរឲ្យហួសចិត្តនោះ ជនសង្ស័យជាមុខសញ្ញាចោរលួច ដែលត្រូវឃាត់ខ្លួនបានជាជនវិកលចរិក។​

លោក​ សិទ្ធ​ ឡោះ ស្នងការរង​ខេត្ត​បាននិយាយថា ជនសង្ស័យជាមនុស្សវិកលចរិក ឈ្មោះ​ ផាត​ ​ផាន់​អាយុ​៣២ ឆ្នាំ មានទីលំនៅភូមិគោកទន្លាប់ ឃុំបន្ទាយនាង ស្រុកមង្គលបូរី ។​

បច្ចុប្បន្នជនសង្ស័យ ត្រូវបានឃាត់ខ្លួនបណ្តោះអាសន្ន ហើយរថយន្តបានប្រគល់ទៅម្ចាស់ដើមវិញ យកទៅជួសជុល៕