ភ្នំពេញ: ដើម្បីបិតបញ្ចប់នូវរឿងចម្រូងចម្រាស់ ដែលបានផ្ទុះឡើងរវាងតារាសិល្ប:រៀមច្បង និងដេនីក្វាន់ តារាសម្ដែងនាង ដេនីក្វាន់ ខ្លួនឯងបានប្រកាសដោយផ្ទាល់មាត់ថា នាងសុខចិត្តសុំទោសជាសាធារណ:ពាក់ព័ន្ធ និងការស្លៀកពាក់ហួសហេតុរបស់នាង។

មហាជន និងតារាសិល្ប:ជាច្រើន កំពុងទន្ទឹងចាំមើលនូវសារសុំទោសរបស់នាង ថានឹងមានការទទួលខុសត្រូវកម្រិតណា ដើម្បីឈានទៅសម្រេចចិត្តថាត្រូវធ្វើចំណាត់ការយ៉ាងណាទៀត ដើម្បីបញ្ចប់រឿងរ៉ាវដែលបានកើតឡើង។

ពេញមួយថ្ងៃទី១២ ឧសភា គេឃើញតារាសិល្ប:ជាច្រើន បានស្រែកប្រកូកប្រកាសនៅលើគណនេយ្យហ្វេសប៊ុករៀងខ្លួន សុំឲ្យមានចំណាត់ការលើតារាសម្ដែងនាងដេនីក្វាន់។ ម្នាក់ៗបានបង្ហាញជំហរគាំទ្រឲ្យមានការប្រកាសដកឈ្មោះនាង ចេញពីពិភពសិល្ប: ដើម្បីកុំឲ្យមានការបន្តខូចឈ្មោះតារាសិល្ប: ព្រោះតែភាពស៊ិចស៊ីហួសហេតុរបស់នាងនោះផង។

អ្នកខ្លះបានប្រកាសថាតារាសិល្ប: ប្រុងលើកបដានៅមុខក្រសួងវប្បធម៌ អ្នកខ្លះបានប្រកាសថា ដេនីក្វាន់ ជានារីដែលត្រូវតែលុបចេញឲ្យបានដាច់ខាត ពីបញ្ជីអ្នកសិល្ប: និងអ្នកខ្លះថានឹងមានសន្និសីទធំមួយ កើតឡើងដើម្បីប្រមូលសំឡេង ស្នើឲ្យក្រសួងដកឈ្មោះនាងចេញ។ បន្ទាប់ពីការផ្ទុះឡើងនូវភាពចម្រូងចម្រាស់នេះ ដេនី ក្វាន់ បានប្រកាសថានាង នឹងសុំទោសជាសាធារណ:ចំពោះការស្លៀកពាក់មិនសមទំនងរបស់ខ្លួន ប៉ុន្តែគេមិនទាន់ឃើញនាងបង្ហោះសារសុំទោសណាមួយ ដូចអ្វីដែលបានលើកឡើងឡើយ។

តារាសិល្ប:ម្នាក់បានអះអាងថា ពួកខ្លួនកំពុងចាំមើលថា ការសុំទោសរបស់ ដេនីក្វាន់ មានន័យដូចម្ដេច និងមានការទទួលខុសត្រូវដូចម្ដេច។ ក្នុងករណីដែលការសុំទោសរបស់នាង មិនមានខ្លឹមសារទទួលខុសត្រូវចំពោះកំហុសឆ្គងរបស់ខ្លួនពាក់ព័ន្ធ និងការបង្កជម្លោះជាមួយតារាសិល្ប:រៀមច្បងនោះ នោះតារាទាំងអស់ក៏មិនសុខចិត្តដែរ។

លោកថា ដេនី ក្វាន់ ជាអ្នកផ្ដើមបង្ហោះភាពស៊ិចស៊ី ធ្វើឲ្យមានការចលាចលនៅក្នុងសង្គមសិល្ប: ហើយដល់ពេលមានការរិះគន់ ក៏មានការជេរប្រមាថមកលើតារារៀមច្បង ដូចជាបានដៀមដាមដល់តារាចម្រៀង ម៉េង កែវពេជ្ជតាជាដើម។ យ៉ាងណាក៏ដោយលោកថា តារាសិល្ប:មិនចង់បានអ្វីក្រៅពីការទទួលខុសត្រូវ របស់នាងចំពោះអ្វីដែលបានបង្កឡើងនោះទេ។

ដេនីក្វាន់ បានថ្លែងប្រាប់ថា រឿងការស្លៀកពាក់ហួសហេតុ នាងនឹងធ្វើការសុំទោស ប៉ុន្តែមកពីនាងស្ថិតនៅខេត្តនៅឡើយ ទើបមិនទាន់បានផុសនៅការទទួលស្គាល់ទាំងនោះជាសាធារណ:។ ក្រុមតារាសិល្ប:អះអាង ពីចាំមើលខ្លឹមសារសុំទោសរបស់នាងនៅថ្ងៃទី១៣ ឧសភានេះ ដើម្បីប្រាកដថាបន្តផែនការធ្វើសន្និសីទកាសែត ឬបញ្ចប់ត្រឹមហ្នឹង៕