ភ្នំពេញៈ ជនសង្ស័យម្នាក់ ត្រូវបានសមត្ថកិច្ចឃាត់ក្រោយពីធ្វើសកម្មភាពបើកទ្វាររថយន្តលួចយកកាបូបយួរដៃ កាលពីវេលាម៉ោង១០និង១៥នាទីព្រឹក ថ្ងៃទី៩ ខែមីនា ឆ្នាំ២០១៧ ស្ថិតនៅចំណុចទល់មុខកន្លែងលក់ផ្កា ផ្លូវឧកញ៉ាម៉ុងឬទ្ធី សង្កាត់ភ្នំពេញ្មថ្មី ខណ្ឌសែនសុខ រាជធានីភ្នំពេញ ។

សមត្ថកិច្ចបានឲ្យដឹងថា ជនសង្ស័យមានឈ្មោះ នី ម៉ូនីន ភេទប្រុស អាយុ១៧ឆ្នាំ ស្នាក់នៅភូមិជំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។

ចំណែកជនរងគ្រោះមានឈ្មោះ ប៉ែន សុភាព ភេទស្រី អាយុ៤៩ឆ្នាំ មុខរបរលក់ដូរ ស្នាក់នៅផ្ទះលេខ៤៩ ផ្លូវលេខ១ បុរីពិភពថ្មី សង្កាត់ភ្នំពេញ្មថ្មី ខណ្ឌសែនសុខ រាជធានីភ្នំពេញ ។ ក្នុងនោះទ្រព្យសម្បត្តិនៅក្នុងកាបូបយួរដៃ មានខ្សែកផ្លាកទីនបន្តោងពេជ្រ,ក្រវិលពេជ្រ,ចិញ្ចៀន,ប្រាក់ដុល្លារ១៣,០០០ដុល្លារអាមេរិក,ប្រាក់រៀលចំនួន២,000,000រៀលនិងឯកសារមួយចំនួន។

មុនឈានដល់ការចាប់ឃាត់ កម្លាំងជំនាញរបស់ការិយាល័យព្រហ្មទណ្ឌបានធ្វើការស្រាវជ្រាវ រហូតឈានចូលថ្ងៃទី១៧ ខែមីនា ឆ្នាំ២០១៧ វេលាម៉ោងប្រហែល៦នាទីល្ងាច ទើបឃាត់ខ្លួនបានជនសង្ស័យម្នាក់នៅចំណុចជាប់របងវត្តព្រែកប្រា សង្កាតព្រែកប្រា ខណ្ឌច្បារអំពៅ តែម្តង។

បច្ចុប្បន្នជនសង្ស័យ ត្រូវបានសមត្ថកិច្ចឃុំខ្លួនជាបណ្តោះអាសន្ន នៅការិយាល័យព្រហ្មទណ្ឌកម្រិតស្រាល ដើម្បីធ្វើការសាកសួរ និងកសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់៕