កណ្តាល: សមត្ថកិច្ចឃាត់ប្រុសស្រី២នាក់ ករណីជួញដូរដោយខុសច្បាប់នូវសារធាតុញៀន កាលពីវេលាម៉ោង១១និង៣០នាទី ថ្ងៃទី២២ ខែមីនា ឆ្នាំ២០១៧ ក្នុងចំណុចភូមិព្រែកសឹង ឃុំសំពៅពូន ស្រុកកោះធំ ខេត្តកណ្ដាល។

ប្រភពពីសមត្ថកិច្ចបានឲ្យដឹងថា ជនសង្ស័យ ចំនួន០២នាក់ ទី១-ឈ្មោះ ឃឹម ខេម៉ា (ហៅ ស្រីពេជ្រ) ភេទស្រី អាយុ៣០ឆ្នាំ ជនជាតិខ្មែរ ស្នាក់នៅសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ មុខរបរលក់ថ្នាំញៀន (ឃាត់ខ្លួន)។ ទី២-ឈ្មោះ សេង សុងហ៊ី (ហៅ ចន្ឋី) ភេទប្រុស អាយុ៣០ឆ្នាំ ជនជាតិខ្មែរ ទីលំនៅភូមិក្បាលកោះ ឃុំឈើខ្មៅ ស្រុកកោះធំ ខេត្តកណ្តាល មុខរបរ បុគ្គលិកកាស៊ីណូក្រោន (ឃាត់ខ្លួន)។ វត្ថុតាងចាប់យករួមមាន ក្រាមពណ៌សថ្លា សង្ស័យសារធាតុញៀន (ម៉ាទឹកកកIce) ចំនួន៤០កញ្ចប់តូច និង០២ កញ្ចប់ធំ ទូរសព្ទ័ចល័តចំនួន០២ គ្រឿង ប្រាក់រៀលចំនួន១០០,០០០ រៀល ប្រាក់ដុងវៀតណាមចំនួន ២០០,០០០ ដុង ប្រាក់ដុល្លាចំនួន ៤ដុល្លាសហរដ្ឋអាមេរិក សម្ភារៈសម្រាប់វេចខ្ចប់ថ្នាំញៀនមួយចំនួន។

សមត្ថកិច្ចបញ្ចាក់ថា កាលពីពេលវេលាកើតហេតុខាងលើ កម្លាំងសមត្ថកិច្ចជំនាញនគរបាលស្រុកកោះធំ បានចល័តល្បាត ក្នុងភូមិសាស្ត្រខ្លួនគ្រប់គ្រងរហូតដល់ចំណុច ឃុំសំពៅពូន។ ពេលនោះបានទទួលព័ត៌មានពីមហាជនល្អថា មានសកម្មភាពលក់ និងចែកចាយគ្រឿងញៀនយ៉ាងសកម្មនៅចំណុច ភូមិព្រែកសឹង ឃុំសំពៅពូន ស្រុកកោះធំ ខេត្តកណ្ដាល។ ក្រោយពីទទួលបានព័ត៌មានភ្លាមសមត្ថកិច្ចជំនាញ បានសហការជាមួយកម្លាំងនគរបាលប៉ុស្ដិ៍សំពៅពូន ចុះស្រាវជ្រាវរហូតដល់ចំណុចកើតហេតុខាងលើ ក៏បានជួបមុខសញ្ញាសង្ស័យឈ្មោះ ឃឹម ខេម៉ា ភេទស្រី អាយុ៣០ឆ្នាំ និងដកហូតបានថ្នាំញៀនចំនួន ៤២កញ្ចប់ (០២កញ្ចប់ធំ ៤០កញ្ចប់តូច) ដែលរកឃើញមាននៅក្នុងកាបូបជាប់និងខ្លួនរបស់ ឃឹម ខេម៉ា។ ភ្លាមៗនោះក៏បន្តឃាត់ខ្លួនបានជនសង្ស័យជាបក្ខពួកម្នាក់ទៀតឈ្មោះ សេង សុងហ៊ី ភេទប្រុស នៅចំណុចភូមិជ្រៃធំ ឃុំសំពៅពូន ស្រុកកោះធំ។

ក្រោយបង្ក្រាបជនសង្ស័យទាំង២នាក់ រួមទាំងវត្ថុតាងថ្នាំញៀន ត្រូវបានបញ្ជូនមកកាន់អធិការដ្ឋាននគរបាលស្រុកកោះធំ ដើម្បីធ្វើការសាកសួរ និងចាត់ការបន្តតាមនីតិវិធី។
នៅចំពោះមុខសមត្ថកិច្ច ជនសង្ស័យឈ្មោះ ឃឹម ខេម៉ា បានសារភាពថា ថ្នាំញៀនចំនួន ៤០កញ្ចប់តូច និង០២កញ្ចប់ធំ ខាងលើនេះ គឺពិតជារបស់ខ្លួនបានទិញយកមកទុកលក់ និងចែកចាយបន្តប្រាកដមែន។ ចំណែកជនសង្ស័យ សេង សុងហ៊ី បានសារភាពដែរថា រូបខ្លួនពិតជាបានទិញថ្នាំញៀន ០៣កញ្ចប់តូច ពីឈ្មោះ ឃឹម ខេម៉ា យកទៅជក់ និងលក់បន្តប្រាកដមែន៕

https://www.youtube.com/watch?v=fs3DhBlzaLw&feature=youtu.be