តាកែវ: លោកអធិការរងស្រុកទ្រាំងបានប្រាប់Post Newsថា កាលពីវេលាម៉ោង៩និង៣០នាទីព្រឹក ថ្ងៃទី ២៧ ខែ មីនា ឆ្នាំ ២០១៧ តាមបណ្តោយផ្លូវជាតិលេខ២ គីឡូម៉ែត្រលេខ៩៣និង៩៤ ស្ថិតក្នុងភូមិព្រៃឈើទាល ឃុំប្រាំបីមុំ ស្រុកទ្រាំង ខេត្តតាកែវ មានករណីគ្រោះថ្នាក់ចរាចរណ៍មួយបានកើតឡើងរវាងម៉ូតូនិងម៉ូតូ មានទិសដៅបញ្រ្ចាសគ្នា ។

ប្រភពដដែលបន្តថា មុនពេលកើតហេតុម៉ូតូសង់កូរ៉េពណ៌ក្រហមពាក់ស្លាកលេខ ភ្នំពេញ 1Y 9748 បើកបរដោយមនុស្សប្រុសពុំស្គាល់អត្តសញ្ញាណ រងរបួសធ្ងន់បញ្ជូនទៅមន្ទីរពេទ្យខេត្តតាកែវ បើកបរពីទិសខាងជើងទៅខាងត្បូង ពេលដល់ចំណុចកើតហេតុបានបត់ឆ្លងផ្លូវពីលិចទៅកើត ស្របពេលនោះក៏មានម៉ូតូមួយគ្រឿងទៀតម៉ាកc125ពណ៌ខ្មៅសេរី២០០៨ ពាក់ស្លាកលេខ កំពត 1D 4306 បើកបរដោយឈ្មោះ អេម ងយ ភេទប្រុស អាយុ៥៤ឆ្នាំ មុខរបរកសិករ ស្នាក់នៅភូមិកន្ទួតធំ ឃុំត្រឡាច ស្រុកទ្រាំង ខេត្តតាកែវ បន្ទាប់ពីបុកដួលខ្លួនឯងរបួសធ្ងន់ ត្រូវបញ្ជូនទៅមន្ទីរពេទ្យដូចគ្នា ក្នុងនោះអ្នកបើកបរពុំមានពាក់មួកសុវត្ថិភាពទេ ។

បច្ចុប្បន្នម៉ូតូទាំងពីរគ្រឿងត្រូវបានសមត្ថកិច្ចយកទៅរក្សាទុកនៅអធិការដ្ឋានស្រុកទ្រាំង ដើម្បីកសាងសំណុំរឿងចាត់ការតាមនីតិវិធី ៕