ភ្នំពេញ: ក្រុមក្មេងស្ទាវប្រុសស្រី១ក្រុម បានបើកថយន្តម៉ាកឡិចស៊ីសGS 300 ១គ្រឿង ក្នុងល្បឿនយ៉ាងលឿនជ្រែវ៉ាគេឯងពេញផ្លូវ ទៅបុករះនឹងរថយន្តចំនួន២គ្រឿងបន្តកន្ទុយគ្នា បណ្តាលឲ្យរងការខូចខាតយ៉ាងដំណំ សំណាងល្អមិនបណ្តាលឲ្យមាននរណាម្នាក់រងរបួសឡើយ។

ហេតុការណ៍នេះបានកើតឡើងកាលពីវេលាម៉ោង១២ និង៤៥នាទី ថ្ងៃត្រង់ទី២៧ ខែមីនា ឆ្នាំ២០១៧ ស្ថិតនៅតាមបណ្តោយផ្លូវលេខ ៦៣ត្រសក់ផ្អែម ក្នុងសង្កាត់ទន្លេបាសាក់ ខណ្ឌចម្ការមន រាជធានីភ្នំពេញ។

តាមប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ គេបានឃើញរថយន្តម៉ាកឡិចស៊ីស GS 300 ពណ៌ស ពាក់ស្លាកលេខ ភ្នំពេញ2AM-4056 ចំនួន១គ្រឿង បើកបរដោយក្រុមក្មេងស្ទាវមួយក្រុម មានប្រុសស្រីជាច្រើននាក់ បានបើកបរក្នុងល្បឿនយ៉ាងលឿនជ្រែគេឯងពេញផ្លូវ លុះមកដល់ចំណុចកើតហេតុ រថយន្តឡិចស៊ីសនោះបម្រុងនិងបើកវ៉ារថយន្តម៉ាកកូរ៉ូឡា ពណ៌ទឹកមាស ពាក់ស្លាកលេខ ភ្នំពេញ2AA-1152 ចំនួន១គ្រឿងដែលបើកខាងមុខ។ ស្របពេលនោះក៏មានរថយន្តមួយគ្រឿងទៀតមកខាងមុខ ហើយអ្នកបើកបររថយន្តម៉ាកឡិចស៊ីសនោះ ក៏បួងចង្កូតកាច់ចូលទៅបុកចំកង់ក្រោយរថយន្តកូរ៉ូឡា១គ្រឿងចំពីក្រោយ និងបន្តទៅបុករថយន្តម៉ាកឡង់គ្រឺស័រ ពណ៌ទឹកប្រាក់ ពាក់ស្លាកលេខ ភ្នំពេញ2Y-2266 ១គ្រឿងហើយ១គ្រឿងទៀត នៅខាងមុខបណ្តាលឲ្យរងការខូចខាតយ៉ាងដំណំ សំណាងមិនបង្កឲ្យនរណាម្នាក់រងបួសនោះឡើយ។

ក្រោយពេលកើតហេតុ កម្លាំងនគរបាលចរាចរណ៍ខណ្ឌចម្ការមន បានចុះមកដល់កន្លែងកើតហេតុធ្វើការវាស់វែងរកខុសត្រូវ និងឲ្យភាគីរថយន្តឡិចស៊ីស GS 300 ជារថយន្តបង្ក និងរថយន្តរងគ្រោះទាំង២គ្រឿង ធ្វើការដោះស្រាយគ្នា ដោយភាគីរថយន្តបង្កយល់ព្រមចេញថ្លៃជួសជុលឲ្យរថយន្តរងគ្រោះទាំង២គ្រឿង បញ្ចប់រឿងនៅនឹងកន្លែងកើតហេតុផងដែរ៕