ភ្នំពេញៈ មនុស្សប្រុសស្រីចំនួន៣នាក់រួមទាំងឧបករណ៍ប្រើប្រាស់គ្រឿងញៀន ត្រូវបាននគរបាលប៉ុស្តិ៍សង្កាត់ទឹកល្អក់៣ ធ្វើការចុះឃាត់ខ្លួនតាមសេចក្តីរាយការណ៍ពីប្រជាពលរដ្ឋ។

ការចាប់ឃាត់ខ្លួននេះបានធ្វើឡើងកាលពីវេលាម៉ោង៩និង៤០នាទីព្រឹក ថ្ងៃទី២៨ ខែមីនា ឆ្នាំ២០១៧ នៅចំណុចផ្ទះលេខ៣៧ ផ្លូវ២៧១ ក្រុម២៩ ភូមិ១១ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ ។

តាមប្រព័ត៌មានពីសមត្ថកិច្ចបានឲ្យដឹងថា មនុស្សប្រុសស្រីទាំង៣នាក់ដែលប្រជាពលរដ្ឋល្អបានរាយការណ៍ប្រមូលផ្តុំប្រើប្រាស់គ្រឿងញៀននៅចំណុចខាងលើទី១មានឈ្មោះ អួន សុធី ភេទប្រុស អាយុ៤២ឆ្នាំ មុខរបរមិនពិតប្រាកដ,ទី២មានឈ្មោះ អាហ្សា ភេទស្រី អាយុ១៥ឆ្នាំ និងទី៣ឈ្មោះ ឡូ នីតា ភេទស្រី អាយុ១៦ឆ្នាំ មុខរបរមិនពិតប្រាកដ ស្នាក់នៅម្តុំស្ទឹងមានជ័យ ខណ្ឌមានជ័យ រាជធានីភ្នំពេញ ។

ប្រភពបានបន្តថា មុនពេលឈានដល់ការឃាត់ខ្លួនមនុស្សទាំង៣នាក់នេះ គឺប្រជាពលរដ្ឋដែលរស់នៅជុំវិញកន្លែងកើតហេតុ បានឃើញកូនម្ចាស់ផ្ទះតែងតែគម្រាមកំហែងធ្វើទុក្ខបុកម្និញដល់ក្រុមគ្រួសារ និងតែងតែប្រមូលផ្តុំគ្នីគ្នាមកស្នាក់នៅប្រើប្រាស់គ្រឿងញៀន បង្កការភិតភ័យព្រួយបារម្ភអំពីសុវត្ថិភាពក្នុងភូមិឃុំ ក៏សម្រេចចិត្តរាយការណ៍ជូនសមត្ថកិច្ច ចុះមកត្រួតពិនិត្យមើលជាក់ស្តែងឃើញមានឧបករណ៍ប្រើប្រាស់គ្រឿងញៀនមួយចំនួន ។

បច្ចុប្បន្នជនសង្ស័យ៣នាក់ រួមទាំងឧបករណ៍ប្រើប្រាស់គ្រឿញៀន ត្រូវបានកម្លាំងនាំមកឃុំខ្លួនបណ្តោះអាសន្ន នៅអធិការដ្ឋាននរគបាលខណ្ឌទួលគោក សាកសួរដើម្បីកសាងសំណុំរឿង បញ្ជូនខ្លួនទៅកាន់តុលាការ ចាត់ការតាមនីតិវិធីច្បាប់៕