ភ្នំពេញ: កម្លាំងនគរបាលនៃអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ ដែលដឹកនាំដោយលោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និង អនុវត្តនីតិវិធី ធ្វើការសហការជាមួយនិងកម្លាំងនគរបាលនៃការិយាល័យអន្តោប្រវេសន៍រាជធានីភ្នំពេញ ដោយមានការសម្របសម្រួលពីលោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ បានចុះត្រួតពិនិត្យការស្នាក់នៅ និងបំពេញការងាររបស់ជនបរទេសនៅក្នុងរោងសិប្បកម្មផលិតទឹកសុទ្ធមួយកន្លែង ដោយធ្វើការឃាត់ខ្លួនជនជាតិវៀតណាមចំនួន ៥នាក់ ក្នុងនោះមានស្រីម្នាក់។

ប្រតិបត្តិការនេះដែរ បានធ្វើឡើងកាលពីវេលាម៉ោង ៨និង៣០នាទីព្រឹក ថ្ងៃទី២៩ ខែមីនា ឆ្នាំ២០១៧ នៅចំណុចរោងសិប្បកម្មផលិតទឹកសុទ្ធមួយកន្លែង ដែលមានទីតាំងតាមបណ្តោយផ្លូវលំ ភូមិអូអណ្តូង១ ក្នុងសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។

លោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្ត នីតិវិធីបានប្រាប់ឲ្យដឹងថា ដោយទទួលបាននូវបទបញ្ជាអំពីសំណាក់លោកយាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ដោយធ្វើយ៉ាងណាអនុវត្តច្បាប់អន្តោប្រវេសន៍របស់ព្រះរាជាណាចក្រកម្ពុជា យើងឲ្យមានប្រសិទ្ធិភាពខ្ពស់នោះ ក្នុងថ្ងៃនេះដែរ កម្លាំងរបស់លោកក៏បានចុះអនុវត្តច្បាប់អន្តោប្រវេសន៍នៃព្រះរាជាណាចក្រកម្ពុជា ដោយបានចុះធ្វើការត្រួតពពិនិត្យការស្នាក់នៅ និងបំពេញការងាររបស់ជនបរទេសនៅក្នុងរោងសិប្បកម្មផលិតទឹកសុទ្ធមួយកន្លែង ដែលមានទីតាំងនៅតាមបណ្តោយផ្លូវលំ ក្នុងសង្កាត់ព្រែកប្រា ខណ្ឌច្បារអំពៅនេះ។

លោកឧត្តមសេនីយ៍ ក៏បានប្រាប់បន្តទៀតថា ដោយក្នុងប្រតិបត្តិការនេះដែរ កម្លាំងរបស់លោកបានរកឃើញជនជាតិវៀតណាមប្រុស ស្រីសរុបចំនួន ៥នាក់ ក្នុងនោះមានស្រីម្នាក់ ដែលកំពុងតែលួចស្នាក់នៅនិងបំពេញការងារដោយខុសច្បាប់ និងដកហូតលិខិតឆ្លងដែនប្រភេទអក្ស T ហួសសុពលភាពចំនួន ១ក្បាលផងដែរ។

ក្រោយប្រតិបត្តិការត្រួតពិនិត្យការស្នាក់នៅ និងបំពេញការងារនេះដែរ ជនជាតិវៀតណាមប្រុស ស្រីទាំង ៥នាក់ ត្រូវបាននាំខ្លួនទៅកាន់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ដើម្បីចាត់ការទៅតាមនីតិវិធីជាបន្តទៅទៀត៕