ភ្នំពេញ: ករណីគ្រោះថ្នាក់ចរាចរណ៍មួយបានកើតឡើង បន្ទាប់ពីរថយន្តម៉ាក ហាយឡែនឌ័រមួយគ្រឿង ពាក់ស្លាកលេខ ភ្នំពេញ 2AJ-7037 បើកទៅបុកក្បាលនាគចែកទ្រូងផ្លូវយ៉ាងពេញទំហឹង ខ្ទេចចេញពីគ្នា បណ្តាលឲ្យរថយន្តនិងរបាំងថ្ម រងការខូចខាត ចំណែកអ្នកបើករត់គេចខ្លួនបាត់ស្រមោល។

ហេតុការណ៍នេះបាន កើតឡើងកាលពីវេលាម៉ោង២និង៥០នាទី យប់ ថ្ងៃទី៣០ ខែមីនា ឆ្នាំ២០១៧ ស្ថិតនៅត្រង់ចំណុចផ្លូវព្រះមុន្នីវង្ស កែងផ្លូវហ្សាលដឺហ្គោល សង្កាត់ផ្សារថ្មី២ ខណ្ឌដូនពេញ រាជធានីភ្នំពេញ។

ក្រោយកើតហេតុ សមត្ថកិច្ចជំនាញចុះមកធ្វើការវាស់វែង នាំយករថយន្តបង្កខាងលើ យកទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ ចាត់ការតាមផ្លូវច្បាប់៕