តាកែវៈ លោកអធិការរងស្រុកបាទី បានប្រាប់Post Newsថា មានករណីគ្រោះថ្នាក់ចរាចរណ៍មួយ បង្កឡើងដោយរថយន្តម៉ាក ហ៊ីយ៉ាន់ដាយ ពណ៌ស មួយគ្រឿង បើកបរក្នុងល្បឿនលឿន ខ្វះការប្រុងប្រុយត្ន័ ទៅបុកជាមួយម៉ូតូសេ១២៥ កំពុងជិះឌុបគ្នា២នាក់ បណ្តាលឲ្យម្នាក់បែកក្បាលស្លាប់ និងម្នាក់ទៀត ត្រូវរថយន្តបង្កកិនធ្លាយខួរស្លាប់មួយរំពេច។

ហេតុការណ៍នេះបានកើតឡើងកាលពីវេលាម៉ោង១រំលងអធ្រាត្រ ឈានចូលថ្ងៃទី៣០ ខែមីនា ឆ្នាំ២០១៧ ស្ថិតនៅចំណុចផ្លូវជាតិលេខ៣ ចន្លោះគីឡូម៉ែត្រលេខ៤១-៤២ ភូមិព្រហែក ឃុំសូភី ស្រុកបាទី ខេត្តតាកែវ។

លោក អធិការរងស្រុកបាទី បានបន្តថា ករណីគ្រោះថ្នាក់ចរាចរណ៍នេះកើតឡើងរវាងរថយន្តហ៊ីយ៉ាន់ដាយ ពណ៌ស ពាក់ស្លាកលេខ ព្រះសីហនុ 3A-3015 បើកបរក្នុងទិសដៅពីជើងទៅត្បូង តាមបណ្តោយផ្លូវខាងលើ លុះបានមកដល់ចំណុចកើតហេតុ ក៏បានបុកជាមួយនឹងម៉ូតូម៉ាក ហុងដាសេ១២៥ ពណ៌ខ្មៅ ឡើងតែម២០១៥ ពាក់ស្លាកលេខ ភ្នំពេញ 1N-1197 បើកបញ្ច្រាស់ទិសគ្នាពេញ បណ្តាលឲ្យអ្នកជិះម៉ូតូទាំង២នាក់ ទី១ឈ្មោះ ចឹក ម៉ៅ ភេទប្រុស អាយុ២១ឆ្នាំ ស្នាក់នៅភូមិត្រពាំទាប ឃុំមហាឬស្សី ស្រុកគងពិសី ខេត្តកណ្តាល ស្លាប់ និងម្នាក់ទៀតឈ្មោះ គឹម សុខហួរ ភេទប្រុស​ អាយុ២២ឆ្នាំ ស្នាក់នៅភូមិអង្គរាំង ឃុំបឹងត្រាញ់ខាងជើង ស្រុកសំរោង ខេត្តតាកែវ ស្លាប់ដូចគ្នា។ចំណែកអ្នកបើកបររថយន្តបើកទ្វាររថយន្តចុះរត់គេចខ្លួនបាត់ស្រមោល។

ក្រោយកើតហេតុសពជនរងគ្រោះទាំង២នាក់ ត្រូវបានសមត្ថកិច្ចប្រគល់ទៅឲ្យក្រុមគ្រួសារ ធ្វើបុណ្យតាមប្រពៃណី ចំណែកមធ្យោបាយធ្វើដំណើរទាំង២គ្រឿង ត្រូវបានសមត្ថកិច្ចយកទៅរក្សាទុក រង់ចាំម្ចាស់រថយន្តចូលខ្លួនមកដោះស្រាយគ្នាតាមផ្លូវច្បាប់៕