ព័ត៌មានជាតិ

ងោកមួយភាំង ជ្រុលចង្កូតទៅបុកគូទរថយន្តធន់ធំកំពុងឈប់ស្ងៀមគៀបជាប់លាន់ដូចរន្ទះ!

ភ្នំពេញ: អ្នកបើករថយន្ត ងក់មួយភាំង ជ្រុលទៅបុកនឹងរថយន្តហ៊ីយ៉ាន់ដាយ មួយគ្រឿងចំពីក្រោយ ដែលកំពុងចតចោលនៅចិញ្ចើមផ្លូវយ៉ាងពេញទំហឹង បណ្តាលឲ្យរថយន្តគៀបជាប់ពីក្រោយ រងកាខូចខាតយ៉ាងដំណំ។

ហេតុការណ៍នេះបានកើតឡើងកាលពីវេលាម៉ោង៤ និង៣០នាទី ទៀបភ្លឺ ថ្ងែទី៣១ ខែមីនា ឆ្នាំ២០១៧ ស្ថិតនៅតាមបណ្តោយផ្លូវជាតិលេខ៦A ស្ថិតក្នុងភូមិកៀនឃ្លាំង សង្កាត់ព្រែកលាប ខណ្ឌជ្រោយចង្វារ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញ រថយន្តមួយគ្រឿងម៉ាកហ៊ីយ៉ាន់ដាយ ធន់ធំ ពណ៌ស ពាក់ស្លាកលេខភ្នំពេញ 3D – 5413 អ្នកបើកបរបើកមកឈប់ចតនៅចិញ្ចើមផ្លូវជាតិលេខ៦A ដើម្បីដាក់អីវ៉ាន់ ហើយខណ:នោះក៏មាន រថយន្តមួយគ្រឿងម៉ាកហ៊ីយ៉ាន់ដាយ ធន់តូច ពណ៌ស ពាក់ស្លាកលេខ កំពង់ធំ 3A- 1908 បើកដោយបុរសម្នាក់ បានធ្វើដំណើរយ៉ាងលឿនតាមបណ្តោយផ្លូវជាតិលេខ៦A ក្នុងទិសដៅពីត្បូងទៅជើង បានរេចង្កូតជ្រុលទៅបុកគូទក្រោយ រថយន្តហ៊ីយ៉ាន់ដាយ ធន់ធំដែលកំពុងចតនៅចិញ្ចើមផ្លូវដែលគ្មានសញ្ញាសម្គាល់នោះ ចំពីក្រោយ យ៉ាងពេញទំហឹង បណ្តាលឲ្យរថយន្តហ៊ីយ៉ាន់ដាយ ធន់តូចនោះ គៀបជាប់រងកាខូចខាតយ៉ាងដំណំ។

ទោះយ៉ាងណាគ្រោះចរាចរណ៍ខាងលើនេះ មិនបានបណ្តាលឲ្យមាននរណាម្នាក់រងរបួសធ្ងន់ ឬបាត់បង់ជីវិតនោះឡើយ។ ក្រោយពេលកើតហេតុភ្លាមៗនោះ តៃកុងដែលបើកបរ រថយន្តមកបុកគេ បានប្រាប់ប្រជាពលរដ្ឋម្តុំកើតហេតុ ថា គាត់ងងុយដេកពេក ទើបងក់មួយភាំងហើយ ពេលគេបើកភ្នែកវិញ ក៏មានគ្រោះថ្នាក់បែបនេះតែម្តង ។

ក្រោយពេលកើតហេតុសមត្ថកិច្ចជំនាញបានចុះមកធ្វើការវាស់វែង យករថយន្តទាំង២គ្រឿងទៅរក្សាទុកនៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ ដើម្បីរង់ចាំភាគីសងខាងធ្វើការ ដោះស្រាយគ្នាទៅតាមផ្លូវច្បាប់ ៕

មតិយោបល់