កំពង់ឆ្នាំង: មានករណីឃាតកម្មដ៏សហាវបំផុតមួយបានកើតឡើង បន្ទាប់ពីជនបង្កជាប្អូនដែលមានជំងឺសសៃប្រសាទ បានកាប់ប្រហារទៅលើជនរងគ្រោះជាបងបង្កើត និងបងថ្លៃ ជាច្រើនកាំបិតបណ្តាលឲ្យដេកស្លាប់ក្នុងថ្លុកឈាមទាំង២នាក់ប្តីប្រពន្ធយ៉ាងរន្ធត់។

ហេតុការណ៍នេះបានកើតឡើងកាលពីវេលាម៉ោង ៨និង៣០នាទី ព្រឹកថ្ងៃទី៣០ ខែមីនា ឆ្នាំ២០១៧ ស្ថិតនៅចំណុចភូមិត្រពាំងសំរោង ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង។

សមត្ថកិច្ចបានឲ្យដឹងថា ជនរងគ្រោះទាំង២នាក់ប្តីប្រពន្ធដែលត្រូវបានជនបង្កកាប់បណ្តាលឲ្យស្លាប់ខាងលើនេះ មានឈ្មោះ សោម កៅ (ហៅចន) ភេទប្រុស អាយុ៥៣ឆ្នាំ ជនជាតិខ្មែរអូស្តា្រលី មកមានប្រពន្ធឈ្មោះ ម៉ុន ចាន់ថន អាយុ៣៥ឆ្នាំ ជនជាតិខ្មែរ រស់នៅចំណុចភូមិត្រពាំងសំរោង ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង ។

ចំណែកឯជនបង្កមានឈ្មោះ ម៉ុន តាអូន ភេទប្រុស អាយុ៣៣ឆ្នាំ (មានជំងឺសរសៃប្រសាទ) ត្រូវជាប្អូនបង្កើតរបស់ ឈ្មោះ ម៉ុន ចាន់ថន ។

បច្ចុប្បន្នសមត្ថកិច្ចជំនាញកំពុងតែស្រាវជ្រាវយ៉ាងដុតដៃដុតជើង ដើម្បីតាមចាប់ជនបង្កខាងលើ យកមកផ្តន្ទាទោសតាមផ្លូវច្បាប់៕