ភ្នំពេញៈ លោក ឌុច សារិន ចៅក្រមជំនុំជម្រះសាលាដំបូងរាជធានី កាលពីព្រឹកថ្ងៃទី២៧ ខែមេសា ឆ្នាំ២០១៧ម្សិលមិញ បានប្រកាសសាលក្រមសម្រេចផ្តន្ទាទោសឈ្មោះ ពៅ សំណាង អាយុ ៦៧ឆ្នាំ ដាក់ពន្ធនាគារកំណត់រយៈពេល ២ឆ្នាំ និងពិន័យជាប្រាក់ចំនួន ៤លានរៀលចូលជាថវិការដ្ឋពីបទ ជួញដូរនូវសារធាតុញៀនដោយខុសច្បាប់ ប្រព្រឹត្តកាលពីថ្ងៃទី២៣ ខែមេសា ឆ្នាំ២០១៧ នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ យោងតាមមាត្រា ៤០នៃច្បាប់ស្តី ការត្រួតពិនិត្យគ្រឿងញៀន។

សូមបញ្ជាក់ថា លោកយាយវ័យ ៦៧ឆ្នាំ ឈ្មោះ ពៅ សំណាង ធ្លាប់មានមុខរបរ ជាអ្នករៀបចំ និងលក់ស្លាធម៌ បាយសី នៅក្នុងភូមិត្រពាំងឈូក (មុខពេទ្យលោកសង្ឃ) បានសម្រេចចិត្តបន្ថែមមុខរបរប្រចាំថ្ងៃមួយទៀតគឺ លក់គ្រឿងញៀន ដោយសារតែលោកយាយគិតថា តំបន់ត្រពាំងឈូក មានទីផ្សារល្អ សម្រាប់លក់ដូរទំនិញ ដ៏ពេញនិយមប្រភេទនេះ និងមានតម្រូវការទីផ្សារខ្ពស់ ព្រមទាំងអាចរកប្រាក់ចំណូលផ្គត់ផ្គង់គ្រួសារបានងាយស្រួល។

ទោះជាយ៉ាងណា មុខរបរថ្មីរបស់លោកយាយ ដែលតែងតែមាន អតិថិជន គាំទ្រមិនចេះដាច់នោះ មិនបានកាក់កបយូរអង្វែងប៉ុន្មាននោះទេ ពោលគឺបានប្រមាណតែរយៈពេលជិត ១ឆ្នាំ ប៉ុណ្ណោះលោកយាយក៏ត្រូវសមត្ថកិច្ចឃាត់ខ្លួនបញ្ជូនទៅតុលាការចាត់ការតាមផ្លូវច្បាប់ ពាក់ព័ន្ធបទល្មើសជួញដូរគ្រឿងញៀន។

នៅក្នុងសវនាការនាព្រឹកថ្ងៃទី២០ ខែមេសា ឆ្នាំ២០១៧នេះ លោកយាយ ពៅ សំណាង បានសារភាពចំពោះមុខតុលាការថា លោកយាយ បានប្រកបរបរលក់គ្រឿងញៀន បានរយៈពេល៩ខែមុនពេលត្រូវចាប់ខ្លួន។

លោកយាយថា គាត់មានម៉ូយគ្រឿងញៀនយកគ្រឿងញៀនទៅលក់ឲ្យដល់ផ្ទះ ដោយមិនបាច់ពិបាកនោះទេ ដែលក្នុងមួយកញ្ចប់តម្លៃទិញចូល ពី ៥ម៉ឺន ទៅ៦ម៉ឺនរៀល ហើយតម្លៃលក់ចេញគឺ ១០ម៉ឺនក្នុងមួយកញ្ចប់។

លោកយាយបញ្ជាក់ថា លុយដែលលក់បានចំណេញលោកយាយ ទុកបម្រុងពេលឈឺ ទិញម្ហូបឲ្យចៅៗហូប និងទុកពេលធ្វើបុណ្យពេលស្លាប់៕

https://youtu.be/NVwJAYddnvI