ព័ត៌មានជាតិ

ឃាត់ខ្លួនជនយុវជនម្នាក់ រួមនិងថ្នាំ៤កញ្ចប់តូចធំ

ភ្នំពេញ: នៅតែបន្តផែកការដ៏ក្តៅគគុកដដែល កម្លាំងអន្តរាគមន៍ខណ្ឌពោធិសែនជ័យល្បាតការពារក្នុងមូលដ្ឋានរបស់ខ្លួន ដោយបង្ក្រាបករណីជួញដូរថ្នាំញៀនម៉ាទឹកកកឃាត់ជនសង្ស័យម្នាក់ និងថ្នាំ៤កញ្ចប់តូចធំ ។

ក្នុងការចុះល្បាតនេះបានធ្វើឡើងនៅវេលាម៉ោង១០និង៤០នាទីយប់ ថ្ងៃទី២៨ ខែមេសា ឆ្នាំ២០១៧ នៅចំណុចមុខក្លឹបមិតណាយ ផ្លូវវេងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ។

សមត្ថកិច្ចបានឲ្យដឹងថា ជនសង្ស័យមានឈ្មោះ ម៉ៅ សំណាង ភេទប្រុស អាយុ១៩ឆ្នាំ មានមុខរបរមិនពិតប្រាកដ មានស្រុកកំណើតភូមិតាអុង ឃុំចម្ការលើ ស្រុកចម្ការលើ ខេត្តកំពង់ចាម ស្នាក់នៅផ្ទះជួល ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។ ក្នុងនោះដកហូត ក្រាមពណ៌សថ្លា សង្ស័យជាសាធាតុញៀនចំនួន៣កញ្ចប់ថង់តូចនិង១កញ្ចប់ថង់ធំ។

មុនឈានដល់ការចាប់ឃាត់ខ្លួន កម្លាំងអន្តរាគមន៍ សហការជាមួយព្រហ្មទណ្ឌខណ្ឌពោធិ៍សែនជ័យ បានធ្វើការជិះម៉ូតូល្បាតការពារក្នុងភូមិសាស្ត្ររបស់ខ្លួន ដើម្បីទប់ស្កាត់បទល្មើសកុំឲ្យកើតមាន។ លុះមកដល់ចំណុចមុខក្លឹប មិតណាយ ផ្លូវវេងស្រេង ភូមិត្រពាំងថ្លឹង សង្កាត់ចោមចៅ ក៏ប្រទះឃើញជនសង្ស័យ កំពុងឈរដោយកម្លាំងសមត្ថកិច្ចមានការសង្ស័យបានធ្វើការឃាត់ឆែកឆេរនិងត្រួតពិនិត្យ រកឃើញថ្នាំញៀនម៉ាទឹកកកចំនួន៣កញ្ចប់ថង់តូចនិង១កញ្ចប់ថង់ធំ បន្ទាប់មកកម្លាំងសមត្ថកិច្ចបាននាំខ្លួនជនសង្ស័យនិងវត្ថុតាង មកកាន់ផ្នែកជំនាញនៃអធិការនគរបាលខណ្ឌពោធិសែនជ័យដើម្បីសាកសួរនាំ។

បច្ចុប្បន្នជនសង្ស័យ ត្រូវបានសមត្ថកិច្ចឃុំខ្លួនបណ្តោះអាសន្ននៅផ្នែកជំនាញ ដើម្បីបន្តអនុវត្តតាមនិតិវិធីច្បាប់៕

មតិយោបល់