ព្រះសីហនុៈ លោកនាយផ្នែកចរាចរណ៍ស្រុកស្ទឹងហាវ បានប្រាប់Post Newsថា មានករណីគ្រោះថ្នាក់ចរាចរណ៍មួយបង្កឡើងដោយខ្លួនឯង ដោយរថយន្តដឹកប្រេងឥន្ទនៈរបស់ក្រុមហ៊ុនតេលា បានបើករេចង្កូតរអិលធ្លាក់ផ្លូវ បណ្តាលឲ្យខ្ទេចក្បាលរថយន្តចំណែកអ្នកបើកបររថយន្តរងរបួស ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះបានកើតឡើងកាលពីវេលាម៉ោង១១និង៤០នាទី ថ្ងៃត្រង់ទី២៩ ខែមេសា ឆ្នាំ២០១៧ ស្ថិតនៅចន្លោះគីឡូម៉ែត្រលេខ ១៦-១៧ ចំណុចក្រុម៤ ភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ។

សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ គឺបង្កឡើងដោយរថយន្តដឹកប្រេងឥន្ទនៈកម្ពុជាតេលា បើកបរដោយបុរសម្នាក់ឈ្មោះ ផន ចំរើន អាយុ៣៣ឆ្នាំ មានស្រុកកំណើត ខេត្តកំពង់ស្ពឺ បើកបរក្នុងទិសដៅពី លិចទៅកើត តាមបណ្តោយផ្លូវខាងលើ លុះដល់ចំណុចកើតហេតុ ក៏រអិលរេចង្កូតធ្លាក់ផ្លូវតែម្តង បណ្តាលឲ្យអ្នកបើកបររថយន្តរងរបួសក្បាល និងចង្កេះ ត្រូវបានបញ្ជូនទៅព្យាបាលនៅមន្ទីរពេទ្យបង្អែកស្រុកស្ទឹងហាវ។

ចំណែករថយន្តវិញ រងការខូចខាតផ្នែកក្បាលខាងមុខយ៉ាងដំណំ៕