កណ្តាលៈ ភ្នាក់ងារ Post News បានរាយការណ៍មកថា បុរសម្នាក់ ត្រូវបានសមត្ថកិច្ចឃាត់ខ្លួន បន្ទាប់ពីប្រើអំពើហិង្សាក្នុងគ្រួសារ។

ការចាប់ឃាត់ខ្លួននេះបានធ្វើឡើងកាលពីវេលាម៉ោង៤និង៣០នាទីល្ងាច ថ្ងៃទី២៩ ខែមេសា ឆ្នាំ២០១៧ នៅចំណុចភូមិកំពង់ល្វា ឃុំស៊ីធរ ស្រុកខ្សាច់កណ្តាល ខេត្តកណ្តាល។

សមត្ថកិច្ចបានឲ្យដឹងថា ជនរងគ្រោះជាប្រពន្ធមានឈ្មោះ ស.ណ អាយុ៤៣ឆ្នាំ មុខរបរកសិករ មានទីលំនៅ ភូមិ ឃុំ កើតហេតុខាងលើ។ ចំណែកជនសង្ស័យជាប្តីឈ្មោះ សាត សាវ៉ាន់ ភេទប្រុស អាយុ៣៧ឆ្នាំ មុខរបរកម្មករសំណង់ មានទីលំនៅភូមិ ឃុំកើតហេតុខាងលើ ។

ប្រភពព័ត៌មានជនរងគ្រោះបានឲ្យដឹងថា កន្លងមកជនសង្ស័យធ្លាប់ប្រព្រឹត្តអំពើហិង្សាលើជនរងគ្រោះជាប្រពន្ធច្រើនលើក សមត្ថកិច្ចនគរបាលធ្លាប់អប់រំចំនួន១លើករួចមកហើយ។ ជាក់ស្តែងនៅថ្ងៃទី២៩ ខែមេសា ឆ្នាំ២០១៧ ម៉ោង៦និង៣០នាទីយប់ ប្តីបានផឹកស្រាស្រវឹងហើយដើរចូលមកផ្ទះ ក៏និយាយនិងប្រពន្ធឲ្យជូនខ្លួនទៅវះគីស ពេលនោះប្រពន្ធមិនព្រមទៅដោយនិយាយថា«មិនទាន់បានណាត់គ្រូពេទ្យទេ» បន្ទាប់មកក៏មានទំនាស់ពាក្យសម្តីជាមួយគ្នាហើយប្តីបានវាយប្រពន្ធមួយដៃត្រូវចំថ្ងាស់ និងរុះជញ្ជាំងផ្ទះធ្វើពីស្លឹកដូង ទម្លាក់មកដីទាំងអស់។ ភ្លាមនោះប្រពន្ធក៏រត់ទៅផ្ទះម្តាយដែលនៅជិតនោះ និង រាយការណ៍ប្រាប់សមត្ថកិច្ចនគរបាលប៉ុស្តិ៍ស៊ីធរកម្លាំងប៉ុស្តិ៍ចុះអន្តរាគមន៍ឃាត់ខ្លួនជនសង្ស័យបញ្ជូនមកអធិការដ្ឋាននគរបាលស្រុក បន្តអនុវត្តតាមនីតិវិធីច្បាប់៕