ភ្នំពេញ: បុរសម្នាក់ បើករថយន្តមួយគ្រឿងម៉ាកកាមរីព្រុស ក្នុងល្បឿនលឿនមិនប្រយ័ត្ន បានរេចង្កូតបុកឡើងរបាំងថ្មចែកទ្រូងផ្លូវ បញ្ឈរកង់២ឡើងលើ បណ្តាលឲ្យរងការខូចខាតទាំងរថយន្តនិងរបាំងថ្ម បង្កការភ្ញាក់ផ្អើលយ៉ាងខ្លាំង។

ហេតុការណ៍នេះបានកើតឡើងកាលពីវេលាម៉ោង៨យប់ ថ្ងៃទី២៨ ខែមេសា ឆ្នាំ២០១៧ ស្ថិតនៅចំណុចក្បែរស្តុបទេពផន តាមបណ្តោយផ្លូវម៉ៅសេទុង ក្នុងសង្កាត់ផ្សារដេប៉ូ១ ខណ្ឌទួលគោក រាជធានីភ្នំពេញ។

ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសម្នាក់ បានបើក រថយន្តមួយគ្រឿង ម៉ាកកាមរីព្រុស ពណ៌ស ពាក់ស្លាកលេខ បាត់ដំបង 2B-1546 បើកតាមបណ្តោយផ្លូវម៉ៅសេទុង ក្នុងទិសដៅពីត្បូងទៅជើង ក្នុងល្បឿនលឿន លុះមកដល់ចំណុចកើតហេតុខាងលើ ទំនងជារថយន្តខាងលើវ៉ានឹងមធ្យោបាយធ្វើដំណើរផ្សេងទៀតដែលនៅពីមុខខ្លួន ស្របពេលដែលចរាចរណ៍នៅទីនោះកំពុងស្ទះ ក៏ស្រាប់តែជ្រុលចង្កូតបុករបាំងថ្មចែកទ្រូងផ្លូវទាំងកម្រោល ឡើងបញ្ឈរជើង២ លើក្បាលនាគចែកទ្រូងផ្លូវតែម្តង។

គ្រោះថ្នាក់ចរាចរណ៍នេះដែរ បានបណ្តាលឲ្យក្បាលនាគចែកទ្រូងផ្លូវ ត្រូវរងការខូចខាតដាច់ចេញពីគ្នា។ ដោយឡែករថយន្ត ត្រូវរងការខូចខាតផ្នែកខាងមុខ គួរសម ។

ក្រោយកើតហេតុសមត្ថកិច្ចមូលដ្ឋាន រួមជាមួយនគរបាលជំនាញចុះអន្តរាគមន៍ វាស់វែងស្ទូចយករថយន្តខាងលើទៅរក្សាទុកនៅការិយាល័យចរាចរណ៍ នៃស្នងការដ្ឋាននគរបាលរាជធានីភ្នំពេញ រង់ធ្វើការដោះស្រាយគ្នាពេលក្រោយតាមផ្លូវច្បាប់៕