កណ្តាល: ភ្នាក់ងារ Post News ប្រចាំខេត្តកណ្តាលបានឲ្យដឹងថា ជនសង្ស័យម្នាក់ ក្នុងចំណោមបក្ខពួក២នាក់ ត្រូវបានសមត្ថកិច្ចឃាត់ខ្លួន ជាមុខសញ្ញាជួញដូរគ្រឿងញៀនយ៉ាងសកម្ម។

ការចុះបង្រ្កាបនេះបានធ្វើឡើងកាលពីវេលាម៉ោង៧និង១៥នាទីយប់ ថ្ងៃទី៣០ ខែមេសា ឆ្នាំ២០១៧ នៅចំណុចមុខផ្ទះជនសង្ស័យ ស្ថិតក្នុងភូមិ ឬស្សីស្រុក ឃុំខ្ពប ស្រុកស្អាង ខេត្តកណ្ដាល។

សមត្ថកិច្ចបានឲ្យដឹងថា ជនសង្ស័យទាំង២នាក់ ទី១មានឈ្មោះ ខុន សុខា ភេទប្រុស អាយុ២៦ឆ្នាំ មុខរបរ ជាងជួសជុលរថយន្ត ស្នាក់នៅភូមិឃុំកើតហេតុខាងលើ ឃាត់ខ្លួន និងទី២ឈ្មោះ ហុង រដ្ឋា ភេទប្រុស អាយុ៣៣ឆ្នាំ មុខរបរ លក់ថ្នាំញៀន ស្នាក់នៅភូមិ ព្រែកតានប់ ឃុំកំពង់ស្វាយ ស្រុកកៀនស្វាយ ខេត្តកណ្តាល គេចខ្លួនបាត់។

ប្រភពដដែលបានបន្តថា មុនឈានដល់ការចាប់ឃាត់ជនសង្ស័យ សមត្ថកិច្ចបានទទួលព័ត៌មានពីប្រជាពលរដ្ឋថា ឈ្មោះ ហុង រដ្ឋា និងឈ្មោះ ខុន សុខា បានជិះរថយន្តដើរចែកចាយគ្រឿងញៀន ពីឃុំខ្ពប ស្រុកស្អាង ដល់ស្រុកកោះធំ រួចក៏ត្រលប់មកវិញ ដល់ចំណុចមុខផ្ទះរបស់ឈ្មោះ ខុន សុខា ដោយជិះរថយន្តរបស់ឈ្មោះ ហុង រដ្ឋា ម្នាក់ឯង សមត្ថកិច្ចនគរបាលស្រុកស្អាង សហការជាមួយប៉ុស្តិ៍នគរបាលរដ្ឋបាលខ្ពប បានធ្វើការឃាត់ ត្រួតពិនិត្យ ដោយទទួលបានបទបញ្ជាពីលោក ស្នងការនគរបាលខេត្តកណ្តាល ដឹកនាំសម្របសម្រួល ពី លោក ស្នងការរង ទទួលផែនប្រឆាំងបទល្មើស និងទទួលបានការឯកភាពពីលោកព្រះរាជអាជ្ញា នៃអយ្យការអមសាលាដំបូងខេត្តកណ្តាល អនុញ្ញាត្តិឲ្យធ្វើការឆែកឆេររកវត្ថុតាង មានការដឹកនាំផ្ទាល់ ដោយលោក វរសេនីយ៍ឯក សេង សុជាតិ អធិការនគរបាលស្រុកស្អាង ធ្វើការត្រួតពិនិត្យ ឆែកឆេរ ផ្ទះរបស់ឈ្មោះ ខុន សុខា និងរថយន្តរបស់ឈ្មោះ ហុង រដ្ឋា ដែលឈ្មោះ ខុន សុខា បើកបានរកឃើញថ្នាំញៀនប្រភេទ ម៉ាទឹកកក ចំនួន៤កញ្ចប់ នៅក្នុងតុតុក្កតារូបគោ ពណ៌ខ្មៅ លាយស ក្នុងរថយន្ត ឧបករណ៍វេចខ្ចប់ និងប្រើប្រាស់គ្រឿងញៀនមួយចំនួន។ ចំណែក ឈ្មោះ ហុង រដ្ឋា បានឲ្យឈ្មោះ ភក្រ័ មកយកដោយជិះម៉ូតូម៉ាក ហុងដា សេ១២៥ ស៊េរីឆ្នាំ០១៦ ពណ៌ខ្មៅ មិនចាំស្លាកលេខ គេចខ្លួនបាត់ ដោយទុកឲ្យខ្លួនបើករថយន្តម្នាក់ឯង។ ក្នុងនោះដកហូតបាន ម្សៅក្រាមពណ៌សថ្លា សង្ស័យជាគ្រឿងញៀន ប្រភេទម៉ាទឹកកក ចំនួន៤កញ្ចប់ ធំ១កញ្ចប់ និងតូច៣កញ្ចប់, តុក្កតារូបគោ ពណ៌ខ្មៅ លាយ ស,រថយន្ត ចំនួន១គ្រឿង ស្ពរ័ ពណ៌ស ពាក់ស្លាកលេខ ភ្នំពេញ 2E-4509 និងឧបករណ៍វេចខ្ចប់ និងប្រើប្រាស់គ្រឿងញៀនមួយចំនួន។

នៅចំពោះមុខសមត្ថកិច្ចឈ្មោះ ខុន សុខា បានអះអាងថា គ្រឿងញៀន ចំនួន៤ កញ្ចប់ ក្នុងតុក្កតា រូបគោ ពណ៌ ខ្មៅ លាយ សនេះ មិនមែនជារបស់ខ្លួនទេ ជារបស់ឈ្មោះ ហុង រដ្ឋា ភេទប្រុស អាយុ៣៣ឆ្នាំ ស្នាក់នៅ ភូមិព្រែកតានប់ ឃុំកំពង់ស្វាយ ស្រុកកៀនស្វាយ ខេត្តកណ្តាល ដែលទុកនៅក្នុងរថយន្តដែលខ្លួនកំពុងបើក។

សូមបញ្ជាក់ ដោយមានការអះអាង ពីប្រជាពលរដ្ឋថា ឈ្មោះ ខុន សុខា ជាមុខសញ្ញាជួញដូរគ្រឿងញៀន យ៉ាងសកម្ម និងមានទំនាក់ទំនងជិតស្និត ជាមួយឈ្មោះ ហុង រដ្ឋា ។

បន្ទាប់មកសមត្ថកិច្ចនគរបាលបានឃាត់ខ្លួនជនសង្ស័យ រួមជាមួយវត្ថុតាង បញ្ជូនមកកាន់អធិការដ្ឋាននគរបាលស្រុកស្អាង ដើម្បីសាកសួរបន្ត និងអនុវត្តន៍ តាមនីតិវិធីច្បាប់៕