ភ្នំពេញៈ ភ្នាក់ងារ Post News បានរាយការណ៍មកថា សមត្ថកិច្ចខណ្ឌឫស្សីកែវ បានធ្វើការចុះបង្ក្រាបទីតាំងលួចលេងល្បែងស៊ីសងខុសច្បាប់ មួយកន្លែង ដោយធ្វើការឃាត់ខ្លួនជនសង្ស័យប្រុសស្រី ៣នាក់ កាលពីវេលាម៉ោង ៥និង១០នាទីល្ងាច ថ្ងៃទី៣០ ខែមេសា ឆ្នាំ២០១៧ ដែលស្ថិតនៅចំណុចមុខផ្ទះគ្មានលេខ ផ្លូវបេតុង ក្រុម៥ ភូមិខ(១) សង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ។

សមត្ថកិច្ចបានប្រាប់ឲ្យដឹងថា ជនសង្ស័យប្រុសស្រីទាំង ៣នាក់ ទី១មានឈ្មោះ ហង្ស ផល្លី ភេទប្រុស អាយុ ៣៥ឆ្នាំ មុខរបរ នៅផ្ទះ ស្នាក់នៅផ្ទះលេខ៥៥៦ ផ្លូវជាតិលេខ៥ ក្រុម២ ភូមិក្រោលគោ សង្កាត់គីឡូម៉ែត្រ៦,ទី២ឈ្មោះ នឿន ណាក់ ភេទប្រុស អាយុ៣៣ឆ្នាំ មុខរបរ កម្មករលីសែងត្រី ស្នាក់នៅផ្ទះជួល ផ្លូវបេតុង ក្រុម៥ ភូមិខ(១) សង្កាត់ច្រាំងចំរេះ២ និងទី៣ឈ្មោះ មិន បុប្ផា ភេទស្រី អាយុ៣៨ឆ្នាំ មុខរបរ ជាងអ៊ុតសក់ ស្នាក់នៅផ្ទះជួល ផ្លូវបេតុង ក្រុម៥ ភូមិខ(១) សង្កាត់ច្រាំងចំរេះ២ ខណ្ឌឫស្សីកែវ។

សមត្ថកិច្ចបានបន្តទៀតថា នៅក្នុងប្រតិបត្តិការនេះ ដោយសារតែមានបងប្អូនប្រជាពលរដ្ឋបានរាយការណ៍មកសមត្ថកិច្ចថា ទីតាំងខាងលើនេះបានបើកលេងល្បែងស៊ីសង (បៀ) ទាំងថ្ងៃទាំងយប់ ដោយលេងក្នុងមួយថ្ងៃៗធំៗណាស់។ ក្រោយពីបានទទួលព័ត៌មានខាងលើនេះ សមត្ថកិច្ចយើងបានបើកប្រតិបត្តិការចុះបង្ក្រាបទីតាំងខាងលើ ដោយឃាត់ខ្លួនបានជនសង្ស័យប្រុសស្រី ៣នាក់ ដកហូតបៀចំនួន១ហ៊ូរ កម្រាលសម្រាប់ត្រាប់ចំនួន១ផ្ទាំង និងប្រាក់ចំនួន ១៤៥,៧០០រៀល ប្រាក់ដុល្លារចំនួន ២០ដុល្លារ ហើយសមត្ថកិច្ចយើងបាននាំខ្លួនមកកាន់អធិការដ្ឋាន ដើម្បីធ្វើការសាកសួរ។

បច្ចុប្បន្នជនសង្ស័យប្រុសស្រីទាំង ៣នាក់ខាងលើ រួមនឹងវត្ថុតាងត្រូវសមត្ថកិច្ចឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីរៀបចំកសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញចាត់ការតាមនិតិវិធីច្បាប់៕