កណ្តាលៈ គ្រោះថ្នាក់ចរាចរណ៍ដ៏រន្ធត់មួយបានកើតឡើង បន្ទាប់ពីក្មេងប្រុសអាយុ១៦ឆ្នាំ ជិះម៉ូតូម៉ាក ហុងដាសេ១២៥ ពណ៌ខ្មៅ ត្រូវរថយន្តមិនចាំម៉ាកមួយគ្រឿង បើកក្នុងល្បឿនលឿនឆ្លងផ្លូវ ជ្រុលមកបុកពេញទំហឹង បណ្តាលឲ្យបែកក្បាលធ្លាយខួរស្លាប់ក្នុងថ្លុកឈាម យ៉ាងអាណោចអាធ័ម។

ហេតុការណ៍នេះបានកើតឡើងកាលពីវេលាម៉ោង១០ ព្រឹកថ្ងៃទី៣ ខែឧសភា ឆ្នាំ២០១៧ ស្ថិតនៅចំណុចមុខស្ថានីយ៍ប្រេងឥន្ទនៈសូគីមិចទួលក្រសាំង ផ្លូវជាតិលេខ២១ ស្ថិតក្នុងភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល។

សមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ បង្កឡើងដោយរថយន្តប៉ែន មិនស្គាល់ម៉ាក (បើកគេចបាត់) បើកបរក្នុងទិសដៅពីកើតទៅលិច បានបើកឆ្លងបត់ឆ្វេង មកដល់ចំណុចខាងលើក៏ បានបុកជាមួយម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខ កណ្តាល 1I-3898 ដែលកំពុងបើកបរដោយក្មេងប្រុសម្នាក់ឈ្មោះ ចំរើន ឬទ្ធីសក្ក័ ភេទប្រុស អាយុ១៦ឆ្នាំ ស្នាក់នៅក្នុងភូមិព្រែកកាត់ សង្កាត់តាក្តុល ក្រុងតាខ្មៅ បើកបរក្នុងទិសដៅពីត្បូងមកជើង ពេញទំហឹងបណ្តាលឲ្យក្មេងប្រុសដែលជាអ្នកបើកបរម៉ូតូ បែកក្បាលធា្លយខួរស្លាប់ក្នុងថ្លុកឈាមនៅនឹងកន្លែងកើតហេតុហើយត្រូវបានរថយន្តសង្គ្រោះរបស់ស្នងការដ្ឋានខេត្ត ដឹកយកទៅប្រគល់ជូនគ្រួសារដើម្បីធ្វើបុណ្យតាមប្រពៃណី។ ចំណែកម៉ូតូខាងលើសមត្ថកិច្ចបានប្រគល់ជូនគ្រួសារវិញ។ រីឯរថយន្តបង្ក បានបើករត់គេចខ្លួនបាត់ស្រមោល៕