ពោធិ៍សាត់ៈ លោកអធិការស្រុកបាកាន បានប្រាប់Post Newsថា មានករណីគ្រោះថ្នាក់ចរាចរណ៍មួយ បង្កឡើងដោយម៉ូតូមួយគ្រឿងជិះឌុបគ្នាដោយល្បឿនលឿន ស្របពេលមានគោដើរឆ្លងផ្លូវ ចាប់ហ្វ្រាំងមិនទាន់ ជ្រុលទៅបុកពេញទំហឹង បណ្តាលឲ្យម្នាក់ស្លាប់ និងម្នាក់របួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះបានកើតឡើងកាលពីវេលាម៉ោង ៧និង៣៥នាទី យប់ ថ្ងៃទី៤ ខែឧសភា ឆ្នាំ២០១៧ ស្ថិតនៅចំណុចចន្លោះគីឡូម៉ែត្រលេខ ២០៨-២០៩ ក្នុងភូមិខ្នាចរមាស ឃុំបឹងខ្នារ ស្រុកបាកាន ខេត្តពោធិ៍សាត់។

សមត្ថកិច្ចបានឲ្យដឹងថា មុនពេលកើតហេតុ គេបានឃើញម៉ូតូមួយគ្រឿងម៉ាក ហុងដាសេ១២៥ ពណ៌ខ្មៅ ស៊េរីឆ្នាំ២០១៥ គ្មានស្លាកលេខ បើកបរដោយបុរសម្នាក់ឈ្មោះ គីម ធី ភេទប្រុស អាយុ ១៩ឆ្នាំ ឌុបជនរងគ្រោះម្នាក់ទៀតនៅខាងក្រោយឈ្មោះ ហឿម ហាក់ អាយុ២៥ឆ្នាំ ស្នាក់នៅភូមិវត្តជ្រៃ ឃុំបឹងខ្នារ តាមបណ្តោតផ្លូវខាងលើ លុះដល់ចំណុចកើយហេតុ ស្រាប់តែមានសត្វគោដើរឆ្លងផ្លូវ ជាហេតុធ្វើឲ្យម៉ូតូខាងលើ ចាប់ហ្វ្រាំងមិនទាន់ជ្រុលទៅបុកគោពេញទំហឹង បណ្តាលឲ្យអ្នកបើកបរស្លាប់ និងអ្នកជោះនៅខាងក្រោយរបួសបាក់ថៃទាំងសងខាង ត្រូវបានបញ្ជូនទៅសង្គ្រោះមន្ទីរពេទ្យបង្អែកខេត្តពោធិ៍សាត់ផងដែរ៕